Þrjár Guðmundsdætur í liði KR og Albert mætti

Karen Guðmundsdóttir kom inn á í leiknum en þetta var hennar fyrsti leikur fyrir KR. Hún hefur verið mikið meidd síðustu ár en er að koma til baka.

Systur hennar Katla og Kara hafa verið að spila með KR-liðinu allt tímabilið. Karen er fædd árið 2003, Katla er fædd árið 2007 og Kara er fædd árið 2010.

Eftir að Karen kom inn á í leiknum í gær voru allar þrjár dætur Guðmundar Benediktssonar og Kristbjargar Ingadóttur, fyrrum leikmanna KR inn á vellinum.

„Karen var að spila sinn fyrsta fótboltaleik í langan tíma vegna erfiðra meiðsla eftir fótbrot árið 2019. Það er því risastór persónulegur sigur fyrir Karen að vera mætt aftur á völlinn sem og KR að fá hana í sínar raðir þar sem hennar knattspyrnuferill hefur hingað til verið allur í Val,“ segir í frétt á miðlum KR.

Nú hefur öll fjölskyldan spilað meistaraflokksleik fyrir Knattspyrnufélag Reykjavíkur en bróðir stelpnanna er landsliðsmaðurinn Albert Guðmundsson. Albert, nýkominn úr landsliðsverkefni, var einmitt mættur á KR-völlinn til að fylgjast með systrum sínum spila saman í gær.