Þjóðin virðist tengja við streituna

Svava Marín Óskarsdóttir skrifar 30. maí 2025 16:31

Kristín átti ekki von á því að eftirspurn eftir miðum á sýninguna yrði svo mikil eins og raun ber vitni.

Það hefur ekkert lát verið á vinsældum einleiksins Á rauðu ljósi, þar sem leikkonan Kristín Þóra Haraldsdóttir blandar saman uppistandi, einleik og einlægni ásamt hugleiðingum um lífið og streituna sem fylgir því að vera manneskja. Nú fagnar Kristín Þóra 100. sýningu einleikjar síns með sérstakri hátíðarsýningu á stóra sviðinu í Þjóðleikhúsinu í haust.

Sýningin Á rauðu ljósi var frumsýnd í nóvember 2023 og hefur verið sýnd í Kjallaranum fyrir fullu húsi vikulega síðan þá. Hún ætlaði bara að halda eina sýningu en hefur orðið að fjölga sýningum, svo mikil er eftirspurn eftir miðum.

„Ég var búin að hugsa um þetta svo lengi og ég var á milli verkefna, vantaði að gera eitthvað og hafði aldrei þorað þessu og ákvað bara að kýla á þetta og það kemur í ljós að fólk er bara sjúkt í stress!“ sagði Kristín hlæjandi í samtali við Vísi fyrir frumsýninguna árið 2023.

Sýningin tekur sem fyrr segir á mörgum þáttum lífsins, þar á meðal streitu, seiglu, dugnaði og stundum tilfinningu aumingjaskaps – en alltaf með húmor og hlýju að leiðarljósi.

Kristín Þóra gerði sýninguna upphaflega til að fylla bil í vinnu sinni á meðan tökum á sjónvarpsseríu var frestað, en verk hennar hefur síðan orðið mikill leiklistarviðburður sem dregur að sér fjölbreyttan áhorfendahóp.

Leikhús Þjóðleikhúsið