Felix kveður Euro­vision

Felix var staddur í Düsseldorf í Þýskalandi á leið heim frá Basel þegar hann greindi frá þessum fréttum á Facebook um sexleytið í kvöld. Hann segir það eiga vel við að millilenda í Düsseldorf eftir síðustu Eurovision-ferð sína því þar hafi ferðalag hans hafist árið 2011 þegar hann fylgdi Vinum Sjonna í keppnina.

„Ég hef á þessum árum unnið sem fjölmiðlafulltrúi, þulur, aðstoðarfararstjóri, fararstjóri og sem meðlimur í stýrihópi keppninnar. Og eins og þið sjáið hefur undirritaður ekkert breyst á fjórtán árum,“ skrifar Felix í færslunni og birtir fjórtán ára gamla mynd af sér.

Felix greinir jafnframt frá því að hann muni á næstunni rifja upp minningar um hverja og eina ferð. Það sem standi upp úr eftir árin fjórtán sé allt yndislega fólkið sem hann hafi kynnst á þeirri vegferð.

Felix sagði sig frá öllum verkefnum á vegum Ríkisútvarpsins síðasta vor vegna forsetaframboðs eiginmanns síns, Baldurs Þórhallssonar. Rúnar Freyr Gíslason fór því sem fararstjóri í keppnina í fyrra en Felix sneri aftur sem fararstjóri í ár, í sitt síðasta skipti.

Tökum þátt til að koma fólki á framfæri og öðlast reynslu

Felix skrifar um það í færslunni af hverju Ríkisútvarpið tekur þátt í Eurovision. Það sé fyrst og fremst til þess að koma íslenskum listamönnum, lagahöfundum, tónlistarmönnum og söngvurum á framfæri við heiminn. 

„Þess vegna leitum við eftir samstarfi við íslenska tónlistarbransann og höfum harðari reglur um lagahöfunda og flytjendur en nokkur önnur þjóð. Það er dýrmætt og hverrar krónu virði, hvað sem hver segir,“ skrifar hann.

„Við tökum líka þátt til að sækja okkur þá reynslu að vera með í þessari risastóru sjónvarpsframleiðslu, sækja hugmyndir og læra af kollegum okkar. Eurovision er enginn sirkus eins og margir virðast halda. Þetta er gríðarlega flókin dagskrárgerð sem besta fólk í heimi kemur að,“ skrifar Felix.

Vonar að málin verði rædd af yfirvegun

Felix segist aldrei verða stoltari eða glaðari en þegar hann sjái íslenska listamenn fá ný tækifæri í kjölfar þátttöku í Eurovision. Sumir hafi getað nýtt keppnina til að skapa sambönd og færa feril sinn upp á annað stig, ýmist erlendis eða á Íslandi.

Hann stígi nú frá borði, þakklátur fyrir tækifærið, en haldi áfram að fylgjast með af hliðarlínunni. 

„Umræðan um Eurovision og þátttöku okkar (og annarra) mun halda áfram og ég vona að okkur beri gæfa til að ræða málið af yfirvegun en fyrst og fremst virðingu fyrir listamönnunum okkar sem eru oft berskjölduð í sviðsljósinu.