„Ég fæ það bara um leið og ég set hann inn“

Það er mjög skiljanlegt að við byrjum að forðast kynlíf þegar við finnum fyrir skömm og vanlíðan í kjölfar þess. Einn algengasti vandinn sem karlmenn og fólk með typpi upplifa í tengslum við fullnægingu er annað hvort seinkað sáðlát eða of brátt sáðlát. Það sem þú lýsir fellur undir of brátt sáðlát. 

Það er þegar sáðlát á sér stað innan við mínútu frá því samfarir hefjast — en það þýðir ekki að það þurfi að taka tímann með skeiðklukku.

Skortur á kynfræðslu í samblandi við klámáhorf hefur leitt til þess að fólk telur gjarnan að samfarir eigi að endast mun lengur en raunhæft er. Sannleikurinn er sá að meðaltími samfara er 5,4 mínútur.

Fyrir þau sem endast í fimm mínútur en væru til í að endast í tíu mínútur, þá falla fyrrnefndar fimm mínútur ekki undir of brátt sáðlát. En hægt er að lengja tímann sem þú endist í samförum eða sjálfsfróun óháð því hversu lengi þú endist nú þegar.

Þegar við erum með kynlífsvanda er ekki óalgengt að draga sig í hlé, upplifa skömm og forðast nánd og kynlíf. Það er mikilvægt að vinna með þessi viðbrögð. Frekar en að aftengjast maka, draga sig í hlé og skammast sín þurfum við að æfa okkur í því að snúa okkur að maka. Ræða saman og finna leið saman til að vinna úr vandanum. 

Of brátt sáðlát þarf ekki að vera endirinn á kynlífinu, hvað finnst makanum þínum gott? Nú er tækifæri til að setja fókus á maka þinn og unað hennar.

Hvernig vinnum við með of brátt sáðlát?

Start–stop tækni

Þetta er ein áhrifaríkasta aðferðin til að lengja tímann sem þú endist. Byrjaðu að æfa þig í sjálfsfróun. Æfðu það að fróa þér þangað til þú ert alveg að fara að fá það og stoppaðu þá, hvíldu þar til þú finnur að dregið hefur úr örvuninni og byrjaðu þá aftur. 

Þetta má endurtaka nokkrum sinnum. Síðan má æfa þetta með maka/leikfélaga. Einnig er hægt að grípa um typpið, ofarlega þar sem kóngurinn mætir restinni af typpinu, á meðan pása er tekin. Með tímanum lærir þú að hægja á þegar þú nálgast fullnæginguna og getur smátt og smátt lengt samfarir.

Grindarbotnsæfingar

Já, strákar geta líka gert grindarbotnsæfingar! Sterkari grindarbotnsvöðvar gefa meiri stjórn. Byrjaðu á því að finna þá með því að stöðva þvagbunu (en æfðu þig ekki þannig daglega). Þú getur líka æft þig að „lyfta“ typpinu upp og niður fyrir framan spegil.

Karlheilsu sjúkraþjálfun

Sjúkraþjálfarar þekkja vel til grindarbotnsþjálfunar fyrir öll kyn og geta veitt einstaklingsmiðaða leiðsögn, sem tekur tillit til líkama þíns og markmiða.

Kynlíf er miklu meira en bara samfarir

Þín fullnæging er ekki endapunktur kynlífs. Taktu samtalið við maka um hvað henni finnst gott og settu fókus á hana þegar þú ert búinn að fá fullnægingu. Ef þú bíður í 15-20 mín er jafnvel hægt að fara aftur í samfarir ef þið hafið áhuga á því. Kynlíf snýst um svo miklu meira en bara fullnægingar og samfarir.

Lykillinn að góðu kynlífi er að líða vel. Þegar við leyfum okkur að snúa okkur að hvort öðru — frekar en frá — opnast nýjar leiðir að unaði sem þurfa ekki að fylgja neinu fyrirfram skrifuðu handriti.

Gangi þér vel ❤️