Daði Freyr og Árný keyptu ein­býli á 86 milljónir

Daði og Árný fluttu nýverið aftur heim til Íslands eftir tíu ára dvöl í Berlín. Saman eiga þau tvö börn.

Daði greindi frá fasteignakaupum á samfélagsmiðlum á dögunum og þakkaði aðdáendum sínum fyrir að hafa fjármagnað nýja húsið.

„Við keyptum okkur hús! Borguðum fyrir það með peningum sem söfnuðust af sölu á listinni okkar. Mig óraði aldrei fyrir að geta sagt það. Takk fyrir allt. Þetta er ykkur að þakka,“ skrifaði Daði og deildi mynd af honum og Árný á Facebook.

Um er að ræða 158 fermetrar hús á einni hæð sem var byggt árið 1971. Við húsið er 45 fermetra bílskúr, byggður árið 1977. Á lóðinni er stór sólpallur með skjólveggjum og heitum potti á suðurhlið, hellulögð innkeyrsla og hellulagður stígur að inngangi hússins.

Eignin skiptist í flísalagða forstofu með góðum fataskáp, gestasnyrtingu, þrjú svefnherbergi, nýlega uppgert baðherbergi, þvottahús, rúmgóða stofu með útgengi á sólpall og rúmgott eldhús með borðkrók.

Í samtali við blaðamann Vísis í nóvember sagði Daði frá áformum þeirra um flutninga til Íslands.

„Annars er það stærsta í þessu að við erum að stefna á að flytja til Íslands aftur, í fyrsta skipti í tíu ár svo það verður heljarinnar breyting. Ég ætla að setja upp góða vinnuaðstöðu þar og halda áfram mínu striki í tónlistinni en prófa að gera það frá Íslandi.“