Ofsa­kláði grípur Spaug­stofu­menn

Njósnamál Björgólfs Thors Björgólfsson fjárfestis, sem greint var frá í Kveik í gær hefur kallað fram gríðarleg viðbrögð og menn vita ekki hvort þeir eigi að hlæja eða gráta.

Áfellisdómur fyrir lögregluna

Eins og fram kom í umfjölluninni tóku þrír lögreglumenn, ýmist nýhættir eða enn við störf, að sér fyrir Björgólf Thor Björgólfsson að njósna um hóp fólks, sem hafði stefnt honum. Jón Óttar Ólafsson og Guðmundur Haukur Gunnarsson, sem er nú látinn, stofnuðu fyrirtækið PPP sem tók verkið að sér. Báðir störfuðu enn sem lögreglumenn þegar fyrirtækið var stofnað.

Lúðvík Kristinsson mótorhjólalögga tók einnig þátt í njósnunum, á vinnutíma hjá lögreglunni. Að sögn Bergþóru Höllu Björnsdóttur lögreglustjóra á höfuðborgarsvæðinu er búið að senda málið til ríkissaksóknara. Og á meðan hefur vinnuskylda Lúðvíks verið afþökkuð. Hvað verður um samning hans við lögregluna mun ráðast af niðurstöðu dómsins.

Málið fór algerlega framhjá Stefáni Eiríkssyni á sínum tíma

Kaldhæðnislegt má heita að málið tekur til þess tíma sem Stefán Eiríksson, nú Útvarpsstjóri, var lögreglustjóri höfuðborgarsvæðisins. RÚV hefur greint frá því að nefnd sem hefur eftirlit með störfum lögreglunnar líti málið alvarlegum augum. Það segir Margrét Einarsdóttir lagaprófessor og formaður nefndarinnar. „Nú er refsiréttarhlið þess er í eðlilegum farvegi hjá ríkissaksóknara en nefndin hefur ákveðið að kalla eftir gögnum strax í dag og við munum samhliða taka málið til meðferðar nefndarinnar,“ segir hún.

Fréttastofa hefur gert ítrekaðar tilraunir til að ná sambandi við Björgólf Thor til að fá fram viðbrögð hans en án árangurs.

Landsmenn vita hins vegar varla hvað þeim á að finnast. Þess sést staður á samfélagsmiðlum.

„Oft hefur okkur Spaugstofumenn klæjað í lófana að komast í hin ýmsu mál sem hafa gerst í íslensku samfélagi síðan við hættum. Nú held ég geti fullyrt að við séum allir með ofsakláða!“ segir Pálmi Gestsson í status sem hefur fengið gríðarleg viðbrögð. En þar merkir hann þá Karl Ágúst Úlfsson, Sigurð Sigurjónsson, Örn Árnason og Randver Þorláksson. Fjölmargir taka þessari hugmynd fagnandi og vilja gjarnan sjá Spaugstofuna fjalla um málið.

Raunverulegur yfirgangur auðgreifa

Illugi Jökulsson fjölmiðlamaður og rithöfundur veit ekki hvort hann á að hlæja eða gráta:

„Vissulega var sú saga sem Helgi Seljan og félagar sögðu í Kveik í gærkvöldi hlægileg. 

En við verðum að gæta þess að láta háðsglósur vegna kauðagangsins í Kókómjólkur-njósnurunum ekki byrgja okkur sýn á það hve stórkostlega alvarlegt mál þetta er í rauninni. Það sýnir hve auðgreifar eru tilbúnir til að seilast langt til að gæta hagsmuna sinna og á hve skítugum skóm þeir telja sjálfsagt að vaða yfir annað fólk. Það sýnir að hér þrífst raunveruleg spilling og raunverulegur yfirgangur auðgreifanna. Það á reyndar ekki að koma okkur á óvart þessa dagana.“

Ýmsir segja reyndar í athugasemdum við færslu Illuga að þeim sjái fátt eitt fyndið við þetta. En fólk veit ekki almennilega hvort það er að koma eða fara. Leikkonan Steinunn Ólína Þorsteinsdóttir veltir þó fyrir sér hvað þurfi til að gerast einkaspæjari: „Vilji maður verða einkaspæjari er best að sækja menntun sína hjá Sérstökum saksóknara. Ætli námið sé lánshæft?“

Djákninn Guðmundur Brynjólfsson telur áhersluna vera á aukaleikara í málinu:

„Mér sýnist öll umræðan snúast um hlaupatíkurnar en ekki glæpamennina sem réðu þær í vinnu. Þetta er sama saga og í fíkniefnainnflutningi þar eru burðardýrin ávallt í kastljósinu.“ 

Ísland - bezt í spillingu

Og Þóra Kristín Ásgeirsdóttir talsmaður Kára Stefánssonar hjá Íslenskri erfðagreiningu segir að nú liggi fyrir hljóðupptökur af því þegar lögmanni Novator er gerð grein fyrir því að lögreglumaður í starfi vinni að þessum persónunjósnum sem um ræðir.

„Hlýtur það ekki að blasa við að það sé ólöglegt að bera mútur á lögreglumann í opinberu starfi og fá hann til að misnota aðstöðu sína. En það er því miður erfitt að treysta lögum eins og í pottinn er búið. Þessir menn, áttu hvert bein í ákveðnum stjórnmálamönnum, keyptu upp hálfa lögmannastéttina og nú er komið í ljós að löggurnar voru líka á launaskrá hjá þeim.“

Þóra Kristín segir þetta bara toppinn á ísjakanum.

„Þær njósnir og þau lögbrot sem við fáum að vita um. Litla sæta og saklausa Ísland. Bezt í spillingu.“