Á eigin­mann og kærasta og allir sáttir

Og er hún mjög vinsæl sem slík. Þórhildur er í hjónabandi en er einnig með kærasta og segir hún að allir séu sáttir með það fyrirkomulag.

Vala Matt hitti Þórhildi í Íslandi í dag á Stöð 2 í vikunni. En eiginmaðurinn hefur einnig leyfi til að vera í sambandi við aðra konu og hefur verið í öðrum samböndum auk hjónabandsins og börnin þeirra eru að þeirra sögn fullkomlega sátt við þetta fjölskyldumynstur. Þórhildur er einnig með mjög vinsælar netsíður og hlaðvörp undir nafninu sundur og saman. En Þórhildur heldur einnig vinsæl námskeið og er núna með spennandi ferð til Malaga á suður Spáni 22. apríl þar sem konur geta farið og sett sig almennilega í fyrsta sæti og endurheimt ástina og skapað hamingjuna í sínu lífi og gleðina.

„Við hjónin höfum núna verið í það sem við köllum opið samband í átta ár. Við vorum búin að vera saman í tíu ár áður en við ákváðum að breyta sambandinu okkar,“ segir Þórhildur og heldur áfram.

„Við höfum verið í sambandi með öðru fólki en aðallega er þetta leið til að upplifa frelsi og fá að vera við sjálf. Ég á núna kærasta, annan heldur en manninn minn. Hann býr ekki á Íslandi og við hittumst af og til og förum og ferðumst eitthvað saman. Þetta getur í rauninni verið hvaða form sem er og þetta er allavega okkar fyrirkomulag núna.“

Hún segir að eiginmaðurinn sé sjálfur ekki í öðru sambandi núna.

„Við erum að mörgu leyti mjög ólík. Ég er mun meiri félagsvera og meira extróvert heldur en hann. Ég hef kannski meiri löngun til þess að vera tengjast fleiri einstaklingum. En það er alveg sama frelsi í báðar áttir og hann er bara ekki í sambandi núna,“ segir Þórhildur og bætir við að eiginmaðurinn hafi verið í einhverskonar sambandi við aðrar konur en ekki af sama toga og hún.

„Sumir eru alltaf í einhverjum samböndum, aðrir eru oftar einir og við erum bara svo ólík öll. Honum finnst það frábært að ég sé að fara til útlanda til að vera með kærastanum og mikið gleðiefni og hann samgleðst mér. Þeir eiga góða samleið saman og það er ekkert nema gleði með þetta.“

Hér að ofan má sjá innslagið í heild sinni þar sem Þórhildur fer dýpra yfir málið.