Skráning hafin í Ís­lands­meistaramótið í Ól­sen ól­sen

„Ég held að þetta sé fyrsta Íslandsmeistaramótið í Ólsen ólsen sem er haldið hér á landi síðan það var haldið í ölhúsinu Gullöldinni í Grafarvogi árið 2011,“ segir Tommi Steindórs, dagskrárstjóri X977 og umsjónarmaður mótsins. „Það er því löngu kominn tími til að endurvekja það enda er Ólsen ólsen líklega mest spilaða spil Íslandssögunnar og um leið einfalt og skemmtilegt spil sem hentar fólki á öllum aldri.“

Íslandsmeistaramótið hefst kl. 15 og fer fram í bruggstofu Reykjavík Brewing Company sem er staðsett í gamla Tónabíói, Skipholti 33, í Reykjavík.

Það er pláss fyrir 32 keppendur í mótinu og er keppt með útsláttarfyrirkomulagi. „Tveir keppendur keppa á móti hvor öðrum og þarf að vinna þrjú spil til að komast í næstu umferð. Í lokin keppa svo tveir keppendur um íslandsmeistaratitilinn.“

Sjálfur er Tommi mikill aðdáandi Ólsen ólsen og grípur reglulega í spilastokkinn með fjölskyldumeðlimum og vinum.

„Hugmyndin að þessu Íslandsmeistaramóti kviknaði á Tenerife í febrúar í fyrra. Þá skipulagði ég Ólsen ólsen mót sem hét Tenerife Invitational þar sem ég stóð uppi sem sigurvegari. Keppendur voru reyndar bara tveir, ég og kærastan mín, en það er allt önnur saga. Í kjölfarið kviknaði sú hugmynd að halda stærra mót sem er nú að verða að veruleika í næsta mánuði.“

Allir geta skráð sig til leiks, svo framarlega að viðkomandi sé orðinn 18 ára. „Síðan höfum við tekið nokkur pláss frá fyrir gamlar Ólsen ólsen kempur og aldrei að vita nema þar leynist nokkur þekkt nöfn sem ætla að láta ljós sitt skína.“

Nánari upplýsingar má finna á Facebook síðu X977 og skráning fer fram á Tix en þátttökugjaldið er 2.500 kr. Öll mótsgjöld fara í pott sem sigurvegari mótsins vinnur, eða 80.000 kr.