Enginn ætti að lesa skila­boðin sem honum hafi borist

Keoghan birti yfirlýsingu á X á laugardagskvöld þar sem hann brást við umfjöllun og fréttum síðustu daga. „Vinsamlegast sýnið virðingu,“ skrifar hann við færsluna og birti þar mynd með löngum texta.

Keoghan og Carpenter tilkynntu 4. desember að þau ætluðu að taka hlé hvort frá öðru eftir tæplega árs samband. Nettröllin fóru í kjölfarið á fullt að dreifa þeim orðrómi að Keoghan hefði haldið framhjá Carpenter með bandaríska áhrifavaldinum Breckie Hill eftir að til þeirra sást á hóteli í Hollywood.

Keoghan gerði Instagram-reikning sinn síðan óvirkan laugardaginn 7. desember og birti í kjölfarið fyrrnefnda yfirlýsingu þar sem hann sagðist ekki þola meira.

„Nafn mitt hefur verið troðið niður í svaðið á netinu á þann hátt sem ég bregst yfirleitt ekki við. Nú þarf ég að bregðast vegna þess að það er komið á stað þar sem búið er að fara langt yfir strikið,“ skrifar hann í færslunni.

Setið um heimili sonarins

Hann segist hafa gert aðgang sinn óvirkan þar sem hann geti ekki lengur látið slíkar sögusagnir hafa áhrif á fjölskyldu hans og vinnu.

„Engin manneskja ætti að þurfa að lesa skilaboðin sem mér hafa borist. Hreinar lygar, hatur, viðbjóðsleg ummæli um útlit mitt, persónu, hvernig ég er sem foreldri og hvers konar ómannúðleiki sem hægt er að ímynda sér,“ skrifar hann einnig í færslunni.

Keoghan segir fólk hafa lýst honum sem heróín-barni og talað fjálglega um uppeldi hans. Þá segir hann fólk hafa bankað upp á hjá ömmu hans, setið um heimili sonar hans og ógnað fjölskyldu hans.

„Þar er farið yfir strikið,“ skrifar hann.

Hann segist leggja hart að sér á hverjum degi til að vera sem heilbrigðastur og sterkastur fyrir son sinn. Hann vilji skapa honum tækifæri til að læra, mistakast og vaxa.

„Ég vil að hann geti horft á föður sinn, haft algjört traust á mér og vitað að ég muni passa hann sama hvað.“

Ekki fjarverandi faðir

Keoghan var til viðtals í hlaðvarpi fjölmiðlamannsins Louis Theroux í síðasta mánuði þar sem hann fjallaði um reynslu sína af fósturheimilum og móður sinni sem lést eftir harða baráttu við vímuefnaneyslu.

Hann geti ekki setið undir því að vera kallaður ónytjungsfaðir (e. deadbeat dad). „Ef ég hefði ekki þykkan skráp og styrkinn sem ég bý yfir, stæði ég ekki hérna,“ sagði hann í viðtalinu. Æska sín hefði auðvitað litað föðurhlutverkið þegar hann hefði enga föðurímynd til að byggja á.

Af því hann birti sjaldan myndir af syni sínum þá haldi fólk því fram að hann sé fjarverandi sem faðir. Raunin væri að frægðin hafi gert það að verkum að hann vilji síður deila syninum með heiminum. Keoghan á Brando, með fyrrverandi kærustu sinni Alysson Kierans.