Barnamálaráðherra keypti fyrsta Jólaálfinn

Tekjum af sölunni á Jólaálfinum er að þessu sinni ætlað að styðja við sálfræðiþjónustu SÁÁ fyrir börn sem alast upp við fíknsjúkdóm á heimilinu. Ráðuneyti mennta- og barnamála styrkir sálfræðiþjónustuna en að auki niðurgreiðir SÁÁ hana með sjálfsaflafé á borð við álfasöluna.

Mikil eftirspurn er eftir sálfræðiþjónustunni. Árlega sinnir SAÁ um 200 börnum auk þess að veita foreldrum og fjölskyldum fræðslu og stuðning.

Með sálfræðiþjónustunni hjálpar SÁÁ börnunum til að takast á við erfiðar tilfinningar, skömm, reiði, áhyggjur og vanmátt sem fylgir því að fullorðinn á heimilinu glími við fíknsjúkdóminn. Börnin fá fræðslu við hæfi um fíknsjúkdóminn og leiðir til að vinna með kvíða og tilfinningar sem tengjast því að alast upp við slíkar aðstæður. Viðtölin miða að því að styrkja sjálfsmynd barnanna og stuðla í leiðinni að forvörnum enda geta börnin sjálf verið í hættu að þróa með sér fíknsjúkdóminn.