Þreyttur á stefnumótaöppum: „Hvernig fer ég að því að kynnast fólki?“

Ahhh já, Stefnumótaöppin! Eins og þau eru frábær þá heyri ég að mörg eiga í nokkurskonar ástar/haturs sambandi við þau! Hversu frábært er það samt að geta kynnst einhverjum í gegnum símann á meðan þú liggur upp í sófa að hámhorfa eitthvað gott raunveruleika-rusl! 

En með tímanum færist þreyta yfir þegar möts verða að engu! Ég held að það flækji alveg lífið að hafa úr svona ótrúlega mörgum tengingum að velja!

Svar mitt beinist ekki eingöngu að einhleypa fólkinu okkar! Því við sem kynntumst makanum okkar á djamminu, og höfum aldrei fengið tækifæri til að prófa öll þessi öpp, höfum líka gott af því að staldra við og skoða hvernig við nálgumst samskipti í raunheimum!

Raunheimarómantík

Reglulega heyri ég fólk lýsa yfir mikilli appþreytu! Sum hafa lengi verið opin fyrir tengingu eða sambandi. Önnur eru nýkomin úr langtímasambandi og kunna illa við það að kynnast fólki í gegnum öpp. Mér finnst gott að minna á mikilvægi þess að prófa nýja hluti eða nálganir. 

Fyrir sum er það raunheimarómantík en fyrir önnur er það að prófa sig áfram á stefnumótaöppum. Ef kvíði er það sem er að stoppa okkur af í því að nálgast annað fólk í gegnum öppin þá er mikilvægt að ögra þeim kvíða og nálgast öppin í litlum skrefum.

En.. þá má líka þrá það að kynnast einhverjum í raunheimum. Við finnum oft mjög fljótt þegar við hittumst hvort það sé hrifning. Það getur verið erfiðara að komast að því í gegnum spjall á netinu.

En þá er bara eitt í stöðunni, að skella sér út og kynnast fólki. En það getur verið snúið að byrja að opna á samskipti eða tengingar við fólk sem við þekkjum ekki í hversdagslífinu. Hér eru nokkur góð ráð!

• Mikilvægt er að koma sér út úr húsinu! Kaffihús, námskeið, líkamsrækt, mæta á viðburði eða skella sér í sjálfboðaliðavinnu. Vertu viss um að þú hafir áhuga á því að mæta og taka þátt. Ekki skrá þig í kór ef þú þolir ekki að hlusta á kórsöng!
• Ef þú ert til í að prófa eitthvað nýtt, breyta þinni rútínu og fara út fyrir þægindarammann ert þú líklegri til að hitta nýtt fólk!
• Líkamstjáning skiptir máli! Ekki sitja úti í horni, með krosslagðar hendur, heyrnatól á höfðinu eða niðursokkin/n/ð í síma/tölvu. Þú vilt senda þau skilaboð að það sé í góðu lagi að nálgast þig. Horfðu reglulega upp og prófaðu að mæta fólki með smá brosi.
• Æfðu þig í stuttum samtölum! Það er mjög gott að getað bryddað upp á spjalli. Sama hversu óþægilegt það er fyrir þig að taka þátt í svona hverdagsspjalli er það mun líklegra til að leiða til tenginga heldur en að nálgast ekki aðra.
• Slepptu pick up línunum og settu frekar fókus þinn á það að ná einlægri tengingu við fólk. Forvitni, opnar spurningar og virk hlustun skila þér lengra en stöðluð viðreynsla.
• Lykilatriði! Í hvert skipti sem þú ferð út er markmiðið ekki endilega að spjallið leiði eitthvað lengra. Settu frekar fókus á það að njóta þín, eiga ánægjulega stund og vera í flæðinu. Það er ekki sexí að að finna fyrir ágengni eða óþolinmæði.

Að lokum vil ég hvetja eigendur kaffihúsa og skemmtistaða til þess að huga sérstaklega að viðburðum fyrir einhleypa. Alltof fáir viðburðir eru tileinkaðir tilhugalífinu hér á Íslandi!

Gangi þér vel!