Myndaveisla frá stjörnufans og gleðinni í Víðidal

Mikil stemning er á mótssvæðinu, enda leikur veðrið við hesta og menn. Það er mál manna að aldrei hafi jafn margir hæfileikahestar birst í braut á Landsmóti, bæði í keppni og á kynbótavellinum. Enda eru áhorfendur agndofa af hrifningu.

„Keppnin hefur gengið frábærlega og gestir eru ánægðir. Veðrið er stór þáttur þegar haldinn er útihátíð á Íslandi, en við höfum verið mjög heppin og lítur vel út með helgina. Landsmótið í ár stendur vel undir væntingum, hér eru allir aldurshópar að skemmta sér og njóta saman,“ segir Hilda Karen Garðarsdóttir mótsstjóri, í samtali við Vísi.

Landsmótið hefur staðið yfir frá því á mánudag, en um helgina eru á dagskrá allir hápunktar, úrslit í öllum keppnisgreinum og verðlaunaafhendingar. Ásmundur Einar Daðason, barna- og menntmálaráðherra, setti mótið formlega á fimmtudagkvöldinu að viðstöddu margmenni, en hann er af góðum ættum hestamanna kominn. 

Í hópreið mættu um 200 knapar, ungir og aldnir, og meðal þeirra voru tveir ráðherrar, þau Áslaug Arna Sigurðurbjörnsdóttir háskóla-, iðnaðar- og nýsköpunarráðherra og Ásmundur Einar Daðason mennta- og barnamálaráðherra.

Skemmtilegasta fólk landsins  

Hjörtur Bergstað formaður Landsmótsins segir mótið hafa gengið framar vonum en svindlsíður sem herja á landsmótsgesti og fjarverandi hestamenn hafa sett skugga á mótið að einhverju leyti. 

Hjörtur segir ekki annað hægt en að allt gangi vel þegar að skemmtilegasta fólk landsins kemur saman til að halda mót. Hann segir hestamenn halda glaða inn í helgina og segir mótið vera það besta hingað til.

„Landsmótið hefur gengið vonum framar. Veðrið hefur verið með okkur í liði það hafa komið nokkrir dropar. En það er bara eins og hestakosturinn að veðrið batnar og hestarnir batna og þetta endar síðan í allsherjar veislu á sunnudaginn,“ segir Hjörtur.

Fyrsta ball Landsmótsins fór fram í gærkvöldi en margir vel kunnugir hestamenn og skemmtikraftar munu stíga á svið til að skemmta viðstöddum um helgina.

„Það var mjög vel sótt og gekk allt vel, allt stórslysalaust í kvöld verður síðan Helgi Björns og SalkaSól og Prettybotjokko og svona heldur þetta bara áfram hjá okkur alveg helgina á enda.“

Gestir á Landsmótinu hafa verið varaðir við þó nokkrum svindlsíðum á samfélagsmiðlum og aðallega Facebook sem hafa pening af fólki með því að lofa beinu streymi af mótinu. Hjörtur segist ekki vita til þess að neinn hafi fallið fyrir svindlinu hingað til.

„Við settum upp Facebook-síðu sem hefur verið notuð fyrir síðustu Landsmót, það eru komnar einvherjar fjórar eða fimm feik síður sem hafa verið að reyna svindla á fólki ég bara hef sjálfur afskaplega litla þekkingu á þessu og ég er svona að reyna vera gamaldags og halda við blað og kúlupennan en fólk þarf bara að varast þetta. Alls staðar í þjóðfélaginu er verið að nota svona síður til að reyna hrella fólk.“

Stjörnufans í Víðidal

Á meðal gesta á Landsmóti eru jafnan þekkt andlit og ekki lét kvikmyndaleikstjórinn og hestamaðurinn Baltasar Kormákur sig vanta ásamt sambýliskonu sinni Sunnevu Ásu Weisshappel og góðum vinum, en meðfylgjandi myndir segja meira en mörg orð um stemninguna á Landsmótinu.

Um helgina fer síðan fram glæsileg skemmtidagskrá, með gleði og góðu stuði á dansleikjum að kvöldi. Rjóminn af íslenskum tónlistarmönnum mætir á svæðið, meðal annars Herra Hnetusmjör, Emmsjé Gauti, Stebbi Hilmars, Helgi Björns, Salka Sól, Sigga Beinteins og fleiri.

Að neðan má sjá myndir frá stemmningunni í Víðidal.

Allar niðurstöður og einkunnir í keppni og á kynbótabrautinni má finna í HorseDay appinu og ítarlega umfjöllun um keppnishluta mótsins og fleira má finna á hestamiðlinum eidfaxi.is.