Kjartan Atli sló metið sem þjálfari sem hann setti sem leik­maður

Álftanesliðið vann í gærkvöldi 21 stigs sigur á Keflavík, 76-55, og jafnaði einvígi liðanna í átta liða úrslitum Subway deildar karla.

Metið var áður í eigu nágranna þeirra í Stjörnunni. Stjarnan vann tuttugu stiga sigur á Snæfelli í fyrsta heimaleik sínum í úrslitakeppni var í átta liða úrslitunum 2009.

Stjarnan jafnaði þá metin í einvígi á móti Snæfelli með 99-79 sigri. Þá þurfti bara að vinna tvo leiki í átta liða úrslitunum og Snæfell fór áfram eftir sigur á Stjörnumönnum í oddaleik í Stykkishólmi.

Svo skemmtilega vill til að Kjartan Atli Kjartansson, þjálfari Álftanesliðsins í dag, var leikmaður Stjörnuliðsins í umræddum leik.

Kjartan skoraði reyndar bara tvö stig í leiknum en stal þremur boltum, tók fimm fráköst og Stjarnan vann með 14 stigum þær rétt tæpu 23 mínútur sem hann spilaði.

Justin Shouse var atkvæðamestur í Stjörnuliðinu með 28 stig, 7 fráköst, 7 stoðsendingar og 5 stolna bolta en Jovan Zdravevski skoraði 25 stig.

Kjartan Atli sló því í gær metið sem þjálfari sem hann setti sem leikmaður fimmtán árum fyrr.