„Með Rúnar Má erum við ekki að gera kröfu á að þeir verði í Evrópubaráttu?“

ÍA er spáð 8. sæti Bestu deildarinnar í árlegri spá íþróttadeildar Vísis og Stöðvar 2 Sports. Skagamenn unnu Lengjudeildina á síðasta tímabili.

ÍA hefur gert nokkrar tilraunir til að festa sig í sessi í efstu deild á síðustu árum en alltaf fallið aftur niður í næstefstu deild.

„Ef allt er eðlilegt verða þeir ekki alveg í neðsta pakkanum en ef ég væri stuðningsmaður ÍA myndi ég leyfa mér að dreyma um að búa til stöðugleika og festa félagið í sessi í efstu deild. Það hafa verið sveiflur. Þegar ÍA hefur komið upp á þessari öld hafa þeir gjarnan komið upp með miklu trukki og byrjað mótið vel en svo fjarar undan þeim,“ sagði Atli Viðar í Besta sætinu, hlaðvarpi íþróttadeildar.

„Mér finnst þeir vera að gera þetta aðeins skynsamar núna. Þeir eru að taka færri leikmenn en betri og búa til eitthvað til framtíðar.“

Aðeins tímaspursmál virðist vera hvenær Rúnar Már Sigurjónsson skrifar undir samning við ÍA. Baldur Sigurðsson segir að koma hans myndi breyta landslaginu uppi á Akranesi og auka kröfurnar á liðið í sumar.

„Fyrir Rúnar Má myndi ég alltaf segja að það yrði frábært tímabil hjá ÍA ef þeir kæmust í efri hlutann, eitthvað markmið til að stefna að því ég held þeir verði ekki í fallbaráttu. Rúnar Már kominn, erum við ekki að gera kröfu á að þeir verði í Evrópubaráttu og berjist við KA, FH, KR og þessi lið? Ég myndi segja það. Með Rúnar Má heilan og þennan hóp finnst mér við geta sett meiri kröfur á þá þrátt fyrir að þeir séu að koma upp úr Lengjudeildinni,“ sagði Baldur.

„Með því að fá Rúnar Má inn, að hann geti breytt það miklu. Rúnar Már í formi, ekki Rúnar Már sem kemur inn í 12. umferð. Þá myndi ég vilja að þeir settu þessa kröfu á sjálfan sig, að þeir geti farið í þessa samkeppni, og eigi að vera fúlir ef þeir nái því ekki.“

Hlusta má á Besta sætið í spilaranum hér fyrir ofan. Þátturinn er einnig aðgengilegur á Spotify sem og öllum hlaðvarpsveitum.