Bestu lið sögunnar: „Maggi er að fara að berjast gegn sjálfum sér“

Sérfræðingarnir Ómar Sævarsson og Magnús Þór Gunnarsson fengu það verkefni að mæla með áframhaldandi þátttöku hvors liðs fyrir sig í úrslitakeppni bestu liða sögunnar.

„Við skulum halda áfram í samkvæmisleiknum okkar að velja besta lið sögunnar. Í kvöld er þetta mjög skemmtilegt því við erum að fara setja af stað rimmu á milli Keflavíkur 1993 og Keflavíkur 2003,“ sagði Stefán Árni Pálsson, umsjónarmaður Körfuboltakvölds.

Þetta er fjórða og síðasta sætið í boði í undanúrslitunum en áður höfðu lið Keflavík 1997, Njarðvíkur 2002 og KR 2009 komist áfram. Liðið sem hefur betur í rimmu Keflavíkur 1993 og Keflavíkur 2003 mætir KR-liðinu frá 2009 í undanúrslitum.

„Það verður geggjað að hlusta á ykkur rökræða þetta. Það er er mjög skemmtilegt við þetta í kvöld er að Maggi er að fara að berjast gegn sjálfum sér,“ sagði Stefán.

Magnús Þór Gunnarsson var lykilmaður i 2003 liði Keflvíkinga en hann fékk þó ekki að tala fyrir því liði. Hann talar fyrir liði Keflavíkur frá 1993 en hann var einmitt vatnsberinn í því liði.

„Ómar, þú ert að fara að berjast með Magga í Keflavík 2003,“ sagði Stefán.

„Mitt uppáhalds Keflavíkurlið,“ sagði Ómar.

Keflavíkurliðið frá 1993 vann þrefalt, varð Íslands-, bikar- og deildarmeistari og vann fimm af sex leikjum sínum í úrslitakeppninni þar af úrslitaeinvígið 3-0.

Keflavíkurliðið frá 2003 varð bæði Íslandsmeistari og bikarmeistari en liðið vann líka þriðja titilinn þegar Keflavík varð einnig fyrirtækjabikarmeistari. Liðið endaði reyndar bara í öðru sæti í deildinni en vann átta af níu leikjum sínum í úrslitakeppninni þar af úrslitaeinvígið 3-0.

Hér fyrir neðan má þá sjá Ómar og Magnús ræða þessi tvö frábæru lið.