Greini­lega betri rjúpna­veiði en í fyrra

Hvort ástæðan sé sú að núna megi ganga allan daginn versus frá hádegi í fyrra er ekki óumdeilt en vissulega getur það verið hluti af skýringunni á betri veiði en betra veðurfar hefur líklega mest um þetta að segja. Veðrið á tímabilinu í fyrra var mjög rysjótt og mun færri dagar þar sem viðraði vel til útivistar heldur en þetta árið. Veiðivísir tók stikkprufu á tíu skyttum til að kanna lauslega hvernig gengi og niðurstaðan úr þessu óvísindalegu úrtaki var sú að sjö eru búnir að ná því sem þeir þurfa í jólamatinn en hinir þrír eiga ekki mikið eftir til að ná því.

Allir voru þeir sammála því að umgengni veiðimanna við rjúpastofninn hafi batnað til muna og duldar atvinnuveiðar séu vonandi löngu liðin tíð enda sala á rjúpnaafurðum bönnuð. Þessir ágætu veiðimenn sem rætt var við stunda veiðar víða um land og tala flestir um að meira hafi sést af fugli en í fyrra í flestum landshlutum nema þá síst á vesturlandi. Við ítrekum að þetta er bara lausleg könnun hjá nokkrum rjúpnaskyttum og engum vísindalegum aðferðum var beitt til að komast að neinni niðurstöðu.