Mynda­veisla frá dular­fullu frum­sýningar­kvöldi Macbeth

Í tilkynningu frá Borgarleikhúsinu kemur fram að ljós í sal hafi kviknað og slokknað aftur á örskotsstundu nokkrum sinnum í röð. Ljós á sviðinu byrjuðu svo eitt af öðru að blikka undarlega. Leikararnir héldu áfram eins og ekkert hefði í skorist en eftir skamma stund kom sýningarstjóri fram á svið og tjáði áhorfendum að um tæknibilun væri að ræða og stöðva þyrfti sýninguna.

Gestir biðu þá í forsal leikhússins á meðan bilanagreining og viðgerð fór fram. Sögðu tæknimenn hússins að slík bilun hefði aldrei átt sér stað áður og væri afar einkennileg.

Mikil upplifun fyrir frumsýningargesti

Ekki er víst hvort bilunin hafi verið af eðlilegum orsökum eða hvort sambland af leikhúsálögum Macbeth, sem ekki má nefna í leikhúsi samkvæmt gamalli hefð, og föstudeginum þrettánda hafi einfaldlega verið of mikið fyrir örlaganornirnar.

Svo mikið er þó víst að þetta hefur verið mikil upplifun fyrir leikhúsgesti og kvöldið verður lengi í þeirra minnum haft. Gestir virðast hafa verið hæstánægðir með sýninguna en henni lauk með standandi lófaklappi og fagnaðarlátum.

Á meðal gesta voru Lilja Alfreðsdóttir, Brynhildur Guðjónsdóttir, Eliza Reid, Theodór Júlíusson, Ólafur Egill Egilsson, Helga Braga Jónsdóttir og Unnsteinn Manuel Stefánsson.

Hér að neðan má sjá myndir frá frumsýningarkvöldinu.