Búist er við mikilli aukningu í komu skemmtiferðaskipa til Íslands

Sér fram á aukningu

Sigurður Jökull Ólafsson, markaðsstjóri Faxaflóahafna, segir iðnaðinn vera búinn að ná sér eftir Covid og að uppsveifla sé í framtíðinni. Næsta sumar segist hann sjá fram á um 40% aukningu í komu skemmtiferðaskipa í landsins, miðað við þær bókanir sem hafa nú þegar verið gerðar.

Jákvæð áhrif á efnahaginn

„Það sem hefur gerst hér eftir covid er að það er aukin ásókn frá skipafélögunum að láta fara fram farþegaskipti hér á íslandi,“ segir Sigurður. Ferðamenn koma þá sérstaklega til landsins til að fara um borð í skipin og dvelja á landinu í kringum förina.

Hann segir erlendar rannsóknir benda til þess að svokallaðir farþegaskipta farþegar eyði þrisvar sinnum meiri fjármunum í sínum ferðum en aðrir ferðamenn. Einnig segir Sigurður að um 36% þeirra sem komi með skipunum til Faxaflóahafna séu farþegaskipta farþegar.

„Þar að auki, þegar skip lætur framkvæma farþegaskipti hérna hjá okkur, þá krefst það aukinnar þjónustu. Aukinn kost, olía og aðra þjónustu þannig í heild þá eru umtalsverð áhrif á hagkerfið í heild þannig að farþegaskiptin eru mjög góð,“ segir hann að lokum í samtali við fréttastofuna.

Verslanir finna fyrir mun

Kaupmenn í miðbænum virðast sumir hverjir verða varir við þessa auknu fjármuni á landinu. Á Reðursafninu segist starfsfólk finna fyrir auknum viðskiptum, sérstaklega þegar illa viðrar. Þá séu ferðamenn líklegri til þess að halda sig í borginni í stað þess að halda á vit ævintýranna og taka Gullna hringinn. 

Starfsfólk verslunarinnar Nordic Store segist einnig finna fyrir gríðarlegri aukningu í viðskiptum við komu skipanna og að götur bæjarins, sem og verslanir, fyllist af fólki.

Íslenskt tónlistarfólk

Skemmtiferðaskiptið Norwegian Prima fór jómfrúarferð sína til Íslands á dögunum og ferjaði söngkonuna Katy Perry með sér til þess að gefa skipinu nafn. Koma skipsins hafði einnig jákvæð áhrif á íslenska listasamfélagið en tónlistarfólkið Bríet, Daði Freyr og Þuríður Blær komu að skemmtanahöldum fyrir gesti skipsins. 

Söngkonan Þuríður Blær lýsir upplifun sinni af skipinu sem kapítalískum draumi: „Þetta var bara algjör sturlun í rauninni. Maður hefur séð skip leggja hérna að bryggjunni í Reykjavíkurhöfn en þetta skip væntanlega komst ekki fyrir þar af því þetta var svo stórt,“ sagði hún meðal annars í viðtali við fréttastofuna.

Hún segir stemninguna um borð hafa verið mjög góða og var gáttuð á vatnsrennibrauta garðinum, þriggja hæða kappakstursbrautinni og listasöfnunum sem hún sá meðal annars í heimsókn sinni á skipið.