Raggi Kjartans kenndi Æði strákunum gjörningalist á typpinu

Ása Ninna Pétursdóttir skrifar 13. júlí 2022 12:15

Æði strákarnir heimsóttu listamanninn Ragnar Kjartansson á vinnustofu hans þar sem hann leiddi þá í allan sannleik um listina, listamannalífið og að sjálfsögðu gjörninga. Skjáskot Stöð 2

„Þetta var alveg með topp þremur steiktustu mómentum lífs míns. Að vera fokking öskrandi, ber að ofan, á meðan Patti er að mála með typpinu og það er einhver fimmtugur karlmaður hoppandi á typpinu í sófanum,“ segir Bassi Maraj um upplifun sína af listgjörning með Ragga Kjartans í síðasta þætti ÆÐI.

Kynnti gjörningalist fyrir ÆÐI strákunum

Strákarnir heimsóttu listamanninn Ragnar Kjartansson sem ræddi við þá um listsköpun, listamannalífið og gjörninga. Markmið þeirra er að læra að verða listamenn og líklega hefur enginn verið betur til þess fallinn að kynna þá fyrir gjörningaheiminum en sjálfur gjörningameistarinn Ragnar Kjartansson, eða Raggi Kjartans eins og hann er yfirleitt kallaður.

Æði strákarnir notuðu tækifærið vel og spurðu því Ragnar spjörunum úr varðandi listina og gjörninga. Í orðsins fyllstu merkingu.

Ragnar Kjartansson ber að neðan að hamra á píanóið þegar hann kynnir Æði strákunum fyrir það sem hann kallar grunn-gjörning. Skjáskot Stöð 2

Patrekur málaði listaverk með typpinu

Þegar Ragnar var búinn að leysa niðrum sig, setja upp í sig tvo vindla og byrjaður að hamra á píanóið kom upp sú hugmynd að Patrekur myndi mála listaverk með typpinu.

„Ég alveg lowkey elska að vera nude! Þannig að ég auðvitað tók því.“

Gjörningurinn þróaðist svo skrautlega áfram og á sama tíma og Æði strákarnir vissu ekki hvaðan á þeim stóð veðrið voru þeir komnir á bólakaf í gjörninga-senuna, hver með sitt óskilgreinda hlutverk.

„Ég var bara í sjokki og vissi ekkert hvað ég ætti að gera. En ég fór samt bara á fjórar, eins og vanalega,“ sagði Binni Glee þegar hann lýsti upplifun sinni.

Hér fyrir neðan er hægt að sjá klippu frá þessum sögulega gjörning Ragnars og Æði strákanna.

„Raggi að vera pínu kinki“

Bassi fór í einhverskonar krákuhlutverk þar sem hann labbaði um, öskrandi og sló alla með kodda. Honum fannst þó nektin kannski fullmikil á köflum fyrir sinn smekk.

„Mér finnst eitthvað óþægilega mikil nekt í gjörningi. En kannski var það bara Raggi að vera pínu kinki!“

Það fór lítið fyrir spéhræðslunni hjá Ragga Kjartans sem kynnti Æði strákana fyrir gjörningalist í síðasta þætti ÆÐI á Stöð 2. Skjáskot

Typpalistaverkið varðveitt á vinnustofu Ragnars

Æði strákarnir sögðust þó allir hafa skemmt sér konunglega þó að upplifunin hafi verið óvænt og öðruvísi. Patrekur Jaime er hæst ánægður með listaverkið sem hann segir vera merki um ástarsorg. Hjarta með ösku inn í.

Verkið mun hanga uppi á vinnustofu Ragnars og verður forvitnilegt að sjá hvort að það seljist til einhverra listaverkasafnara í framtíðinni.

Listaverkið sem Patrekur Jaime málaði með typpinu mun hanga uppi á vinnustofu Ragnars og segist Bassi viss um að verkið gæti selst á margar miljónir. Sjáskot Stöð 2

Fyrir áhugasama er hægt að nálgast alla ÆÐI þættina á Stöð 2+.

Æði Bíó og sjónvarp Menning Myndlist

Tengdar fréttir

Ógeðslegt en líka „low key æðislegt“ að flaka fisk

Sjómannadagurinn var haldinn hátíðlegur víða um landið í dag. Í Reykjavík var líf og fjör á Grandanum þar sem hátíðargestir fengu meðal annars heldur óhefðbundna kennslu í hvernig flaka á fisk frá Æði strákunum. Ekki það æðislegasta sem þeir hafa gert en þó ekki það ógeðslegasta.

12. júní 2022 23:00

Bassi tók alla athyglina í leiklistartíma hjá Þorsteini Bachmann

Fjórða þáttaröðin af Æði er farin í loftið og eru þættirnir á dagskrá Stöðvar 2 á miðvikudagskvöldum. Þar er fylgst með lífi Patreki Jaime, Binna Glee og Bassa Maraj.

20. júní 2022 14:31