„Hef enn ekki hitt þá manneskju sem er skemmtilegri í glasi en án þess“

Hún fór af stað með „Edrúar febrúar“ herferð á samfélagsmiðlum í gær sem á að hvetja Íslendinga til þess að sleppa neyslu áfengis í þessum mánuði. Sylvía er innflutningsaðili að drykknum Töst sem er orðinn vinsæll kostur hjá fólki sem velur áfengislausan lífsstíl. Sylvía hefur áður sagt frá því í viðtali á Lífinu á Vísi þegar hún drakk ekki áfengi óvart í eitt ár.

„Ég hef aldrei átt við vandamál tengt áfengi og þess vegna þótti skrítið að ég skildi fara þessa leið. Ég er samt ekkert að segja að ég sé hætt að drekka áfengi að eilífu heldur met hvert tilefni fyrir sig. Ég er ekki manneskja sem að lifi við boð eða bönn heldur vill fylgja innsæinu og hvað er best fyrir mig hverju sinni. Mér finnst bara svo hollt að skoða sjálfa sig og neysluna sína. Að það sé þessi heilbrigði millivegur, en það er oft erfitt að finna milliveginn þegar líf án áfengis er oft undantekningin. Þess vegna með þessu framtaki vildum við hvetja fólk í að prófa. Sjá hvort einhver finni heilsufarslegan mun og veita innblástur,“ útskýrir Sylvía.

„Ég græddi svo margt eftir að ég prófaði að velja mér óáfenga drykki eins og Töst. Heilsufarslegur ávinningur sem ég fann fyrir var betri svefn, meiri orka, meiri framtakssemi, minna stress, meiri tími og almennt betri lífsgæði.“

Margir þekktir einstaklingar tóku þátt í herferðinni sem mun birtast á Instagram síðu Töst. Á meðal þeirra sem hafa nú þegar rætt um sínar ástæður til að velja áfengislausan lífsstíl, alltaf eða tímabundið, eru Brynja Dan og Guðrún S. 

„Það var erfitt að setja saman myndatöku í miðjum faraldri og því fleirri sem að hefðu viljað taka þárt en gátu,“ segir Sylvía um herferðina.  Myndirnar fyrir þessa herferð tók ljósmyndarinn Hlín Arngríms.

Undanfarið hafa margir opnað sig um ákvörðun sína að velja áfengislausan lífsstíl, til dæmis Tómas Guðbjartsson læknir, skemmtikrafturinn Eva Ruza og fleiri.  

„Ég drekk ekki því ég vil ekki missa stjórnina. Ég elska að vera hress alla daga eftir djamm og skemmti mér jafn vel án áfengis. Ég hef enn ekki hitt þá mannneskju sem er skemmtilegri í glasi en án þess,“ segir Brynja Dan við þetta tilefni.