74 ára göngu­garpur nálgast þrjú þúsund ferðir á Úlfars­­fell

„Ég hafði stundað sund nokkuð reglu­lega en var orðinn leiður á því að vera alltaf á kafi í vatni þegar ég var að hreyfa mig,“ sagði Sig­mundur í sam­tali við frétta­mann Stöðvar 2, sem hélt upp á tind Úlfars­fells í kvöld til að hitta á kappann.

Sam­tal þeirra má sjá hér að neðan:

Sig­mundur hóf ferðir sínar á fjallið árið 2006. Hann á­kvað þá að fara hundrað ferðir á ári.

„Síðan hefur þetta undið svona upp á sig. Ég hef verið mjög á­nægður að taka þessa á­kvörðun. Mér finnst meira gaman að labba upp í móti en að labba á jafn­sléttu og mér hefur fundist þetta góð hreyfing,“ segir hann.

„Ég hef notið þess að ganga hérna og ætla að reyna að halda á­fram á meðan ég get.“

Er þetta á­kveðin keppni eða ein­hver þrá­hyggja?

„Það má kannski segja að þetta sé að þróast yfir í svo­litla þrá­hyggju… ég verð eigin­lega að viður­kenna það,“ svarar Sig­mundur.

„Ég reyni að fjölga ferðum á hverju ári. Ég ætla að vona að ég slái eitt­hvert met á þessu ári, ef allt gengur að óskum.“