Fyrirtæki sem greiddi út hundruð milljóna braut samning við Reiknistofu lífeyrissjóða

Eiður Þór Árnason skrifar 7. júlí 2021 20:54

Reiknistofa lífeyrissjóðanna er til húsa í Guðrúnatúni. Þar deilir félagið húsi með Gildi lífeyrissjóði og Eflingu sem eru meðal fjölmargra notenda Jóakims. Vísir/Egill

Hugbúnaðarfyrirtækið Init braut samninga við Reiknistofu lífeyrissjóða (RL) með því að semja við undirverktaka án heimildar. Þetta er niðurstaða úttektar ráðgjafafyrirtækisins Ernst & Young (EY) á samningi aðilanna um rekstur tölvukerfisins Jóakims.

Var annars vegar um að ræða félag með sama eignarhald og hins vegar nokkur félög í eigu stjórnenda Init. Fyrirtækið sér um rekstur Jóakims sem heldur utan um réttindi og iðgjöld sjóðfélaga í fjölda lífeyrissjóða og verkalýðsfélaga.

Hundruð milljóna króna arður

Greint var frá því fréttaskýringaþættinum Kveik í apríl að Init hefði um árabil rukkað lífeyrissjóði fyrir vinnu sem efasemdir væru um að stæðist lög. Þá hefðu hundruð milljóna króna streymt úr félaginu til dótturfélagsins Init-reksturs, sem virtist ekki hafa annan tilgang en að fela arðgreiðslur þess. RL sagði upp þjónustusamningi sínum við Init í lok maímánaðar.

Í Kveik kom fram að viðskipti Init við systurfélag sitt Init-rekstur og félög lykilstjórnenda hefðu numið 914 milljónum króna á fimm árum og að lífeyrissjóðirnir hefðu greitt þetta að mestu.

Fram kemur í úttekt EY að ekki verði séð að eðlilegur rekstrartilgangur hafi að öllu leyti legið að baki greiðslum milli áðurnefndra félaga. Þetta kemur fram á vef RL en stjórn Reiknistofunnar hyggst á næstu vikum fara ítarlega yfir niðurstöður úttektarinnar og skoða hvort gripið verði til aðgerða á grunni þeirra.

Skortur á eftirfylgni

Í úttektinni kemur enn fremur fram að eftirfylgni hafi skort af hálfu RL hvað varðar ýmis atriði síðustu árin. EY bendir á að gjaldskrá hafi verið ógegnsæ og að viðskipti Init við félög tengd eigendum þess hafi flækt reikningsskil félagsins og haft áhrif á birta afkomu þess.

Að mati ráðgjafafyrirtækisins voru ákvæði í samningi RL og Init um upplýsingagjöf um slík viðskipti ekki nægjanlega yfirgripsmikil. Einnig kemur fram að samningar við hýsingaraðila kerfisins þurfi að endurskoða og skýra þurfi ákvæði um persónuvernd.

„Það liggur ljóst fyrir að svigrúm til lækkunar gjaldskrár fyrir þjónustu Inits var vanmetið af hálfu RL,“ segir á vef félagsins.

„Ekki kemur til greina af hálfu stjórnar RL að gera nýjan samning um rekstur og þjónustu Jóakims á svipuðum grunni eða forsendum og sá samningur sem nú hefur verið sagt upp.“

Lífeyrissjóðir

Mest lesið

Fleiri fréttir