Hlutu styrk fyrir hönnunarfræðslu fyrir börn og ungmenni

Sylvía Rut Sigfúsdóttir skrifar 29. maí 2021 20:00

Styrkþegar ásamt Lilju D. Alfreðsdóttur, mennta- og menningarmálaráðherra við úthlutun í Hörpu fyrir helgi. Miðstöð hönnunar og arkitektúrs

Miðstöð hönnunar og arkitektúrs í samstarfi við List fyrir alla hlaut í þessari viku styrk úr Barnamenningarsjóði fyrir verkefnið Hönnun fyrir alla - hönnuðir framtíðarinnar. Um er að ræða framleiðslu á stuttum og vönduðum þáttum, kennsluefni um hönnun og arkitektúr sem miðast að börnum og ungmennum.

„Ljósi verður varpað á fjölbreytilegar greinar hönnunar og störf sem tengjast þeim með aðgengilegum og áhugaverðum hætti. Fjallað verður um allt frá arkitektúr til fatahönnunar, grafíska hönnun, yfir í húsgagnahönnun, vöruhönnun, stafræna hönnun og upplifunarhönnun,“ segir í tilkynningu Miðstöðvar hönnunar og arkitektúrs.

Katrín Jakobsdóttir forsætisráðherra og Lilja D. Alfreðsdóttir, mennta- og menningarmálaráðherra, tilkynntu í Hörpu um úthlutun úr Barnamenningarsjóði Íslands. Alls fengu 37 verkefni styrk og nemur heildarfjárhæð styrkjanna 90 milljónum króna en alls bárust 113 umsóknir. Hlutverk sjóðsins er að fjármagna og styðja við fjölbreytta starfsemi á sviði barnamenningar með áherslu á sköpun, listir og virka þátttöku barna í menningarlífi.

„Markmið verkefnisins Hönnun fyrir alla - hönnuðir framtíðarinnar er að auka aðgengi kennara og nemenda í grunn- og framhaldsskólum landsins að vönduðu efni um hönnun og arkitektúr. Þar mun koma fram um hvað greinarnar snúast, hvernig greinarnar standa á Íslandi og hvaða tækifæri og störf greinarnar bjóða upp á. Efnið miðast að börnum og ungmennum þar sem áhersla verður lögð á að það sé áhugavert um leið og það skapar tækifæri fyrir kennara að fjalla um greinarnar og tengja við nærumhverfi nemenda, hvar sem þau búa.“

Þáttunum verður miðlað á Listveitunni, vef List fyrir alla og á heimasíðu og miðlum Miðstöðvar hönnunar og arkitektúrs.

Tíska og hönnun HönnunarMars