Eltast við ullarhnoðra í hríðarbyl að Fjallabaki

„Maður verður bara að standa upp aftur,“ segir Sif Ólafsdóttir í þættinum Um land allt á Stöð 2 en þar er fjallmönnum Land- og Holtamanna fylgt í leitum á Landmannaafrétti í haust.

„Maður fylgir þessum ullarhnoðrum út um allt,“ segir Dagný Rós Stefánsdóttir.

„Maður hafði eiginlega meiri áhyggjur af því að hesturinn rynni bara niður. Þetta var svo sleipt þarna uppi,“ segir Sif.

„Svo safnast snjórinn svo undir hófana á þeim,“ segir Dagný Rós.

„Þeir eru alveg á stultum, greyin,“ segir Sif.

Leitirnar í síðari hluta septembermánaðar í haust voru með þeim erfiðustu um árabil sökum illviðris sem göngumenn hrepptu á hálendinu. Fjallkóngurinn Kristinn Guðnason fór þar fyrir flokki fimmtíu fjallmanna.

Fjallið Löðmundur er með þeim hæstu á þessum slóðum, 1.077 metra hátt. Í hlíðum þess sjáum við göngumenn fóta sig áfram upp á hæstu brúnir í hríðinni.

Við Löðmundarvatn hittum við þá Braga Guðmundsson, sem býr í Garðinum en stundar hestamennsku í Flagbjarnarholti, og Rökkva Hljóm Kristjánsson frá Hólum á Rangárvöllum. Þeir höfðu smalað svæðið allt frá Landmannalaugum þann daginn.

Og það er heldur ekki hættulaust að vera akandi við þessar aðstæður. Í brekkunni upp Dómadalshálsinn er Hugrún Hannesdóttir næstum búin að missa jeppann út af í hálku og með fjögurra ára gamlan son sinn í bílnum. Kerran í eftirdragi fór í vinkil þegar jeppinn tók að renna niður brekkuna.

Þátturinn er endursýndur á Stöð 2 í dag, sunnudag, klukkan 14.30. 

Hér má sjá sex mínútna myndskeið: