Þórálfur er fjór­tánda jóla­vættin í borginni

Ný jólavætt hefur bæst í hópinn hjá Reykjavíkurborg. Er um að ræða jólavættina Þórálf sem þykir reglusamur og ákveðinn, enda sér hann um allar sóttvarnir í helli jólasveinanna.

Frá þessu segir á vef Reykjavíkurborgar en síðustu ár hafa margir tekið þátt í jólavættaleik borgarinnar og reynt að hafa uppi á jólavættunum í miðborginni. Er ætlað að hvetja borgarbúa og aðra gesti til að njóta miðborgarinnar á aðventunni.

Það er Gunnar Karlsson myndlistarmaður sem teiknaði vættirnar en leikurinn hefur lífgað upp á miðborgina í jólatíð allt frá 2011.

Um Þórálf segir að hann eigi það til að skella sér óvænt til byggða á aðventunni til að næla sér í nauðsynjar og þá sé eins gott að passa vel upp á sprittbrúsana sína og grímurnar.

Alls má nú finna fjórtán jólavættir víðs vegar um borgina, en nálgast má upplýsingar um leikinn hér. Þannig eru Leppalúði, Leiðindaskjóða, Stekkjastaur, Jólakötturinn og fleiri furðuverur búnar að koma sér fyrir á húsveggjum víða í miðbænum og getabörn jafnt sem fullorðnir reynt að leita uppi vættirnar.