„Það tók svolítið á að leyfa mér að opna á þessa persónulegu hlið“

Ólafur Arnalds tilkynnti í dag útgáfu nýrrar plötu, some kind of peace, sem væntanleg er 6. nóvember næstkomandi og sendi frá sér smáskífuna We Contain Multitudes. Á plötunni some kind of peace kveður við nýjan og persónulegri tón.

„Ég áttaði mig á að ég hef tilhneigingu til þess að fela mig bak við stór þemu og úthugsaðar hugmyndir á plötunum mínum. En það sem yfirleitt hrífur mig þegar ég hlusta á tónlist annarra er einlægni, einhver snerting við líf listamannsins. 

Mér fannst vera kominn tími til þess að ég gerði plötu sem gengi nær mér en áður og sýndi meira af sjálfum mér. Það reyndist í raun ekki auðvelt. Það tók svolítið á að leyfa mér að opna á þessa persónulegu hlið og vera ekki feiminn að hleypa fólki svona nálægt. 

Á endanum varð hún eiginlega svo persónuleg að ég er ennþá að átta mig á því hvernig ég á að tala um hana,“ segir Ólafur um plötuna.

Auk Ólafs koma meðal annars fram á plötunni breski raftónlistarmaðurinn Bonobo, þýska söngkonan Josin og Jófríður Ákadóttir, betur þekkt sem JFDR. Ólafur hafði þegar samið um helming plötunnar þegar faraldurinn tók að láta á sér kræla í upphafi árs og einangraði sig í nýju hljóðveri sínu í Reykjavík mánuðina þar á eftir til þess að klára. Til stóð að fylgja plötunni eftir í haust með stóru tónleikaferðalagi en vegna faraldursins þurfti að hætta við og bíða þangað til aðstæður eru betri.

Frumsýndi nóturnar á undan laginu

Ólafur hefur nú frumsýnt aðra smáskífuna af plötunni, píanóballöðuna We Contain Multitudes. Lagið var samið seint um kvöld á lítið rafmagnshljómborð. Myndbandið við lagið var tekið upp á heimili Ólafs í Reykjavík en það var Blair Alexander sem leikstýrði. 

Útgáfa lagsins We Contain Multitudes er að mörgu óvenjuleg. Lagið kom í raun út síðastliðinn sunnudag en þá birtust nóturnar á samfélagsmiðlum Ólafs þar sem hann hvatti aðdáendur sína til þess að taka upp þeirra eigin útgáfu af laginu án þess að hafa nokkurn tímann heyrt hvernig það hljómar. Fjölda ábreiða hefur verið deilt á samfélagsmiðlinum Instagram undir myllumerkinu #wecontainpianos.

Hér fyrir neðan má sjá dæmi um slíkar ábreiður.

„Ólafur Arnalds hefur um árabil verið í fremstu röð íslenskra tónlistamanna og hefur undanfarin áratug sannað sig sem eitt áhrifamesta nútímatónskáld heims. Ólafur hefur á ríflega 10 ára ferli gefið út fjölda platna undir eigin nafni, leikið með rafsveitinni Kiasmos víðsvegar um heim auk þess að semja tónlist fyrir kvikmyndir og sjónvarpsþáttaraðir á borð við Broadchurch og Defending Jacob — en fyrir þá síðarnefndu hlaut hann á dögunum tilnefningu til Emmy-verðlauna,“ segir í tilkynningu um plötuna.

Síðustu plötu Ólafs, re:member, var gífurlega vel tekið, bæði af aðdáendum og gangrýnendum, en henni fylgdi hann eftir með rúmlega 150 tónleika ferðalagi um allan heim og seldi m.a. upp tónleika í óperuhúsinu í Sydney, Royal Albert Hall í London og Eldphilharmonie í Hamburg.