Kona á átt­ræðis­aldri lést af völdum kórónu­veirunnar í Bret­landi

Bresk heilbrigðisyfirvöld tilkynntu í dag að kona á áttræðisaldri hafi látist af völdum COVID-19 sjúkdómsins sem kórónuveiran veldur. BBC greinir frá því að konan hafi átt við heilsuvandamál að stríða og hafði hún reglulega þurft að leggjast inn á sjúkrahús vegna undirliggjandi sjúkdóma.

Konan var greind með kórónuvírus við innlögn á Royal Berkshire spítalann í Reading í gær. Talið er að hún hafi smitast í Bretlandi, þar sem ekki eru taldar líkur á að hún hafi ferðast erlendis undanfarnar vikur.

Fjöldi smitaðra í Bretlandi tók stórt stökk í gær þegar yfir 30 manns greindust með veiruna. Heildarfjöldi smitaðra þar í landi er nú 116.

Boris Johnson, forsætisráðherra Bretlands, vottaði aðstandendum konunnar samúð sína og sagði að heilbrigðisstarfsfólk Bretlands ynni hörðum höndum að því að undirbúa frekari baráttu gegn veirunni.