Í dragt frá Alexander McQueen

Leikkonan Meghan Markle hefur sýnt það að hún ætlar ekki að vera einhver hefðbundin prinsessa þegar hún gengur að eiga Harry Bretaprins í vor. Allavega finnst Bretum hún óhefðbundin þegar kemur að fatavali og stíl. Þá hefur Markle ákveðið að halda ræðu í eigin brúðkaupi, eitthvað sem tíðkast víst ekki í konunglegum breskum brúðkaupum. 

Í gærkvöldi mætti hún ásamt unnusta sínum Harry á góðgerðakvöldverð og klæddist svartri buxnadragt frá Alexander McQueen og í hvítri blússu með slaufu frá merkinu Tuxe. Einfalt og smart. 

Breska þjóðin er hrifin og sérstaklega þar sem Markle er að velja breska hönnun í auknum mæli. Það mætti kannski halda að hún hefði verið að hugsa um sjónvarpsþættina sem hún sagði nýverið skilið við, Suits, en á dögunum var tilkynnt að leikkonan Katherine Heigl mun bætast við seríuna vinsælu í næstu þáttaröð.