Flóamarkaður í anda Vetements

,,Þetta byrjar allt á flóamörkuðunum, þannig við tókum þetta þangað," sagði Demna Gvasalia, listrænn stjórnandi og hönnuður Vetements. Eftirvæntingin er mikil eftir sýningum Vetements, enda þykir Demna mikill frumkvöðull í tískuheiminum. Sýningar Vetements eru haldnar áður en tískuvikurnar hefjast, og sýnir hann karla-og kvenlínurnar á sama tíma. Þessi sýning var sett upp eins og á gömlum flóamarkaði, sem fyrirsæturnar örkuðu um. 

Í þessari línu viðurkenndi Demna að hann hafði orðið fyrir miklum áhrifum frá Martin Margiela, en þar starfaði hann áður en hann stofnaði Vetements. Áhrifin komu fram í því hvernig hann tók í sundur fatnað frá flóamörkuðum og setti þau aftur saman, en Martin Margiela varð frægur fyrir að gera það sama. ,,Heimurinn er fullur af upplýsingum og tilvísunum, og með þessari línu notuðum við það til að fá hugmyndir," sagði Demna um það hvaðan innblásturinn fyrir línuna kom.

Demna kom hettupeysunni inn sem tískuvöru og heldur hann því áfram, og er mikið um stórar hettupeysur. Höfuðklútar eru gríðarlega áberandi í línunni, og eru jafnvel settir yfir derhúfur. Mismunandi litum og mynstri er skellt saman, og í þessari línu gildir því meira því betra. 

Þegar spáð er í hverja flík fyrir sig er mikið í hana lagt og mikið af skemmtilegum hugmyndum. Demna segir að hans vinir klæði sig einmitt svona, hrúgi öllu saman, og er mjög líklegt að hans helstu aðdáendur muni tileinka sér þennan stíl líka.