Hamilton vann í Singapúr en Vettel féll úr leik

Lewis Hamilton á Mercedes kom fyrstur í mark í Singapúr kappkastrinum í Formúlu 1. Daniel Ricciardo á Red Bull varð annar og Valtteri Bottas á Mercedes varð þriðji.

Sebastian Vettel á Ferrari, helsti keppinautur Hamilton í heimsmeistarakeppni ökumanna féll úr leik strax á fyrsta hring. Vettel lenti í þriggja bíla samstuði í ræsingunni. Hann og Kimi Raikkonen á Ferrari voru brauðið í samlokunni en Max Verstappen á Red Bull áleggið á milli þeirra.

Hamilton jók forskot sitt í heimsmeistarakeppni ökumanna um 25 stig og bilið er því 28 stig honum í vil gegn Vettel.

Ferrari menn ætluðu sér aldeilis að sækja stig í Singapúr en fengu ekkert út úr því.

Keppnin var ræst á blautri braut. Það er því í fyrsta skipti sem rigningakeppni fer fram undir flóðlýsingu.

Ræsingin var dramatísk. Báðir Ferrari mennirnir féllu úr leik. Kimi Raikkonen átti ógnar fljóta ræsingu. Sebastian Vettel féll svo úr leik skömmu seinna á fyrsta hring. Hann lenti á varnarvegg eftir að hafa misst stjórn á bíl sínum.

Öryggisbíllinn var kallaður út og hringsólaði með halarófuna fyrir aftan sig á meðan brautin var hreinsuð upp. Öryggisbíllinn kom svo inn á fjórða hring.

Lewis Hamilton var þá orðinn fremstur og í kjörstöðu til að hesthúsa helling af mikilvægum stigum í baráttunni við Sebastian Vettel. Ricciardo varð annar eftir bröltið í ræsingunni og Hulkenberg á Renault þriðji.

Fernando Alonso hætti keppni á McLaren bílnum á níunda hring. Hann fékk mikið högg á sig í ræsingunni sem hefur líklega skaðað bíl hans.

Öryggisbíllinn kom út aftur þegar Daniil Kvyat lenti á varnarvegg á 12. hring. Ricciardo kom inn á þjónustusvæðið og fékk annan gang af milli-regndekkjum undir á sama tíma. Fleiri fylgdu í kjölfarið. Hulkenberg var þá orðinn annar en Ricciardo þriðji. Hulkenberg kom svo inn og fékk milli-regndekk undir í skiptum fyrir full regndekk.

Kevin Magnussen á Haas var fyrsti maðurinn til að setja þurrdekk undir bílinn. Hann kom inn á 25. hring. Felipe Massa kom inn á sama hring og tók einnig últra-mjúk þurrdekk undir. Þremur hringjum seinna var Magnussen farinn að setja hraðasta hring keppninnar. Ricciardo kom svo inn á 29. hring og fékk últra-mjúk dekk undir. Hamilton kom svo inn í kjölfarið og fékk últra-mjúku dekkin undir.

Hraðinn í keppninni jókst talsvert þegar allir voru komnir á þurrdekk. Staðan breyttist þó mjög lítið.

Marcus Ericcson lenti á varnarvegg og öryggisbíllinn kom út í þriðja skipti í keppninni á 38. hring. Öryggisbíllinn fór svo inn á 40. hring og keppnin var endurræst. Hamilton gerði allt rétt og stakk Ricciardo af strax í kjölfar endurræsingarinnar.

Hamilton sigldi þokkalega auðan sjó síðustu hringina eftir endurræsinguna. Bilið aftur í Ricciardo var svipað allan tíman.

Keppnisstjórn þurfti að stytta keppnina um nokkra hringi enda var kappaksturinn búinn að taka tvo klukkutíma. Reglurnar kveða á um að ekki megi líða meira en tveir klukkutímar frá ræsingu til endaloka keppninnar að því gefnu að keppnin sé ekki stöðvuð.

Hér að neðan má sjá öll helstu úrslit helgarinnar.