Atli Jamil varð annar á N-Evrópumótinu í torfæru

Í síðasta mánuði fór fram N-Evrópumótið í torfæru og fór keppnin fram í Ler í Noregi. Atli Jamil Ásgeirsson á Thunderbolt var eini íslendingurinn sem fór með bíllinn sinn frá Íslandi til að keppa og stóð sig frábærlega. Hann lenti í öðru sæti. Eknar voru 6 brautir á laugardeginum og 6 brautir á sunnudeginum og allar brautir giltu í mótinu.

Sextán keppendur voru mættir til leiks, 10 í sérútbúna flokknum og 6 í sérútbúnum götubílum. Keppendur komu frá 4 löndum. Flestir frá Noregi eða 12 keppendur en síðan voru keppendur frá Íslandi, Svíþjóð og Danmörku. Mikil rigning var á svæðinu alla helgina en keppendur, aðstoðarmenn og keppnishaldarar létu það ekki á sig fá og keppnin var mjög góð í alla staði.

Leiddi keppnina eftir fyrri dag

Atli leiddi keppnina eftir í lok fyrsta dags eftir frábæran akstur allan daginn. Á degi tvö var Atli óheppinn með rásröð og missti forskotið sitt niður en eins og áður segir hafnaði Atli Jamil í öðru sæti, sem er frábær árangur. Það var norðmaðurinn Tor Egil Thorland á Ugly Betty sem vann mótið. Atli Jamil í öðru sæti og norðmaðurinn Arne Johannessen varð í þriðja sæti. Þetta mót var líka hluti af Noregsmeistaramótinu og taldi til 4. og 5. umferðar þess móts. Þar af leiðandi sigraði Atli Jamil í 4. umferð Noregsmótsins sem fór fram á laugardeginum. Hann lenti svo í öðru sæti í 5. umferð þess sem fór fram á sunnudeginum.

Atli nældi sér einnig í tilþrifaveðlaunin eftir góða björgun í síðustu braut sunnudagsins. Framundan hjá Atla Jamil á Thunderbolt er að halda áfram í Noregsmeistaramótinu. Bíllinn varð eftir í Noregi og ætlar Atli Jamil að taka þátt í næstu tveimur umferðum í mótinu, en þær fara fram í Skien sem er suður af Osló. Keppnin þar fer fram 2. og 3. september og verður forvitnilegt að sjá hvernig ganga mun hjá Atla þar. Í sérútbúna götubílaflokki sigraði Jorgen Poulsen en Sigurjón Guðmarsson, Íslendingur sem er búsettur í Noregi, hætti keppni eftir fyrsta dag vegna bilana.