Ricciardo: Ég trúi ekki að ég hafi unnið frá tíunda sæti

Daniel Ricciardo kom fyrstur í mark í dramatískri Formúlu 1 keppni í Bakú í dag. Hann vann þar með sína fimmtu keppni. Hver sagði hvað eftir keppnina?

„Ég trúi því eiginlega ekki að ég hafi unnið keppnina frá tíunda sæti. Þessi keppni var raunar bara brjálæði. Ég var með brak í bremsukerfinu og var 17. þegar ég kom út á brautina eftir það. Ég var vosnvikinn í gær með mistökin. Ég vissi að það myndi borga sig að halda sig frá vandræðum,“ sagði kampakátur Ricciardo á verðlaunapallinum.

„Ég var bara flissandi undir hjálminum síðustu hringina,“ sagði Ricciardo. Hann lét svo Stroll drekka úr skónum sínum venju samkvæmt.

„Þetta var sturluð keppni. Ég þurfti að taka fram úr öllum nánast. Þetta kennir manni að gefast aldrei upp. Liðið stóð sig vel á meðan keppnin var stöðvuð við að laga smá vandamál í bílnum. Það var ekki pláss á milli mín og Kimi Raikkonen í upphafi. Þetta var keppnisatvik en það er ótrúlegt að þetta séu alltaf við Kimi,“ sagði Valtteri Bottas sem tryggði sér annað sæti í dag með því að taka fram úr Lance Stroll á síðasta hring í hreinni spyrnu í átt að endamarkinu. Bottas var á 12. hring einum hring á eftir og síðastur.

„Ég er bara orðlaus. Ég er ekki búinn að átta mig á þessu ennþá. Ég einbeitti mér bara að því að halda mig frá vandræðum. Þetta er sennilega einn tæpasti endasprettur í sögunni, við vorum hlið við hlið yfir línuna. Síðustu tvær keppnir hafa verið svakalegar,“ sagði Stroll sem landaði sínu fyrsta verðlaunasæti í Formúlu 1 í dag.

„Ég hlakka bara til að komast heim. Þið sáuð hvað gerðist, mér er eiginlega alveg sama. Ég get ekkert sagt sem lagar aðstæðurnar. Mér finnst 10 sekúndur ekki nægileg refsing fyrir svona háttalag,“ sagði Lewis Hamilton sem varð fimmti í dag.

„Mér finnst ekki rétt að ég hafi fengið refsingu. Við hverju bjóst hann. Ég snerti hann aftan frá,“ sagði Sebastian Vettel.

„Ég fór svo upp að hliðinni á honum og lyfti höndinni upp til að sýna honum að ég væri ekki sáttur með þetta,“ bætti Vettel við. Vettel vildi hins vegar ekki tala um það að hann hefði ekið inn í hliðina á Hamilton, sem hann vissulega gerði.

„Það getur allt gerst í kappakstri. Við vorum niðurlút eftir fyrsta atvikið sem snéri að okkur í keppninni, þegar við þurftum að taka Daniel Ricciardo inn því bresmurnar voru að ofhitna vegna braks í bremsukerfinu. Daniel Var svo heppin með hvernig keppnin þróaðist,“ sagði Christian Horner, liðsstjóri Red Bull.

„Ég veit ekki hvort höfuðvörn Hamilton losnaði eða brotnaði. Ég veit ekki hvað gerðist og ég er ekki að fara að kenna neinum um þetta. Ég er fjári pirraður með að hafa ekki unnið keppnina,“ sagði Toto Wolff, liðsstjóri Mercedes.