Eurovision atriði Svölu lekið á netið

Það varð uppi fótur og fit í dag þegar í ljós kom að upptaka af æfingu á Eurovision atriði Íslands hefði lekið á netið. Myndbandið hefur verið tekið úr dreifingu.

„Það hefur einhver verið í salnum sem átti ekki að vera þar, tekið atriðið upp og einfaldlega sett upptökuna á netið,“ er haft eftir Felix Bergssyni, fararstjóra íslenska hópsins í frétt á vef RÚV.

Upptaka af æfingu á atriðinu, þar sem úkraínsk söngkona flutti lagið Paper í stað Svölu Björgvinsdóttur, rataði á YouTube og hafði fengið nokkrar athugasemdir og áhorf þegar lekinn kom í ljós.

Æfingin var til þess gerð að undirbúa tæknilið keppninnar og á upptökunni mátti sjá grafíkina sem notuð er í atriðinu þó að atriðið í heild hafi ekki lekið.

Felix segir það óheppilegt að einhver hafi stolist til að sýna atriðið opinberlega. Hann segir þó að undirbúningurinn hafi gengið mjög vel að lekanum undanskildum.