Max Verstappen vann á Spáni

Max Verstappen á Red Bull vann sinn fyrsta kappakstur. Kimi Raikkonen varð annar og Sebastian Vettel varð þriðji.

Verstappen er 18 ára og 227 daga gamall og hann er þar með yngsti ökumaðurinn til að vinna Formúlu 1 kappakstur. Það er sérstaklega sætt fyrir Verstappen eftir allt það drama sem gengið hafði á hjá Verstappen og Kvyat í vikunni eftir að Kvyat var færður til Toro Rosso til að gera pláss hjá Red Bull fyrir Verstappen.

Nico Rosberg stal fyrsta sætinu af Lewis Hamilton á ráskaflanum og inn í fyrstu beygju. Hamilton ætlaði að svara fyrir sig en það endaði með ósköpum. Árekstur Mercedes manna batt enda á keppni þeirra beggja.

Sjá einnig: Myndband af árekstri Mercedes.

Ricciardo tók við forystunni þegar Mercedes ökumenn voru úr leik. Max Verstappen leiddi keppnina um tíma og var þar með yngsti ökumaðurinn til að leiða Formúlu 1 kappakstur.

Ferrari hófst svo handa við að elta Red Bull sem voru í forystu. Vettel gerði harða atlögu að Verstappen.

Eldur kom upp í bíl Nico Hulkenberg á hring 23. Hann datt því úr leik og þurfti sjálfur að brúka slökkvitækið til að slökkva eldin í bíl sínum. Brautarstarfsmenn voru ekki alveg með á nótunum þegar Hulkenberg nam staðar fyrir framan þá.

Barátta Ferrari og Red Bull

Ricciardo kom inn í sitt annað þjónustuhlé á hring 28 og setti mjúk dekk undir. Vettel fylgdi svo í kjölfarið á næsta hring.

Verstappen tók þjónustuhlé á hring 34 og Kimi Raikkonen kom á þjónustusvæðið á næsta hring.

Vettel tók þjónustuhlé á hring 37, einungis átta hringjum eftir að hann setti mjúku dekkin undir. Vettel kom út í fjórða sæti og hóf að elta Raikkonen, Verstappen og Ricciardo. Ricciardo átti eftir að taka eitt þjónustuhlé og hann var að tapa miklum tíma.

Ricciardo kom inn á 44 hring og setti milli-hörð dekk undir. Hann kom út á brautina í fjórða sæti og Verstappen leiddi þá. Raikkonen var annar, rétt um sekúndu á eftir Verstappen og Vettel þriðji, um sjös sekúndum á eftir Raikkonen. Annað eins bil var svo í Ricciardo.

Heimamaðurinn Fernando Alonso á McLaren missti afl á hring 48. Hann var úr leik annað árið í röð í spænska kappakstrinum.

Slagurinn á milli Raikkonen og Verstappen var ógnar spennandi. Bilið rokkaði á milli þess að vera ein sekúdnda niður í að vera hálf sekúnda. Raikkonen elti unga Hollendinginn hring eftir hring.