Wolff er gapandi yfir þroska Hamilton

Toto Wolff, liðsstjóri Mercedes liðsins í Formúlu 1 segir að Lewis Hamilton hafi þroskast gríðarlega mikið síðan hann kom til liðsins.

Wolff segir að ófarir tímabilsins hafi reynt á Hamilton en þolinmæði og þroski viðbragða heimsmeistarans hafa sýnt hversu mikið hann hefur þroskast andlega. Wolff segist raunar gapandi yfir andlegum þroska Hamilton.

Wolff segir að það sé ekki annað hægt en að sýna Hamilton samúð. Hann hefur mátt þola óhapp í fyrstu beygju í öllum þremur keppnum tímabilsins.

Hamilton er nú 36 stigum á eftir liðsfélaga sínum Nico Rosberg, í heimsmeistarakeppni ökumanna. Rosberg hefur aldrei náð meira forskoti á Hamilton. Hamilton er þó ákveðinn í að koma til baka í baráttuham.

„Hann er á góðum stað, þroskinn sem við höfum séð hann ná andlega er ótrúlegur. Hann hefur verið stöðugur síðustu þrjú ár, frá því hann kom til liðins. Hann hefur unnið tvo heimsmeistaratitla og fundið sig sem manneskju að mínu mati,“ sagði Wolff.

„Það er gríðarleg pressa á honum með allri þeirra gagnrýni sem beinist að honum en hann heldur áfram að trúa á eigin innsæi og hann fylgir eigin sannfæringu og það virðist virka fyrir hann,“ bætti Wolff við.

„Við erum með tvo mjög góða ökumenn sem eru í góðum gír, og hafa unnið svo vel með liðinu og smita orkunni sinni í liðið og leiða alla áfram og hvetja alla til að standa sig. Lewis hefur verið snöggur að koma í bílskúrinn og taka í hendina á öllum og klappa þeim á bakið þrátt fyrir misjafnt gengi. Ég hef verið gapandi yfir því, það er frábært,“ sagði Wolff að lokum.