Bein útsending frá afhjúpun Volvo S90 kl. 17:30

Í dag kl. 17.30 mun Volvo afhjúpa Volvo S90 í beinni útsendingu á YouTube.  Á viðburðinum, sem fer fram í Gautaborg, mun Volvo kynna bílinn og ýmsar nýjungar. Þar á meðal eru spennandi nýjungar í átt að sjálfkeyrandi bílum og frekari þróun á öryggiskerfinu Borgaröryggi (e. City Safety) sem nú nemur einnig stór dýr, hvort sem er í myrkri eða dagsbirtu.

Volvo ætlar með þessum laglega bíl að hrista uppí markaðnum fyrir stærri lúxusbíla og bíta hressilega af kökunni frá BMW, Mercedes Benz og Audi. Þessi S90 bíll leysir af hólmi S80 og verður sölu hans hætt.

Vélbúnaður S90 verður að mestu sá sami og í boði er í nýja XC90 jeppa Volvo og er þar aðeins notast við fjögurra strokka vélar, þó í mismunandi útfærslum, allt að 400 hestöflum með rafmótorum til aðstoðar.