Flugfreyjur hjóla naktar ef þær fá tvö þúsund læk

„Það gengur glimrandi vel, við erum á glæsilegum meðalhraða og hér er geggjuð stemning,“ segir Margrét Björnsdóttir, liðsmaður í WOW Freyjum, en WOW Cyclothon hjólreiðakeppnin stendur nú yfir og taka 116 lið þátt. Hún var í viðtali í Morgunþættinum á FM957 en fjöldi þátttakenda í ár hefur meira en tvöfaldast frá því í fyrra.

Sjá einnig: Bein útsending: WOW Cyclothon 2015



„Veðrið er frábært, það er logn og algjör paradís. Við erum að taka svona korter á mann. Sjálf hef ég ekkert sofið og er að fara leggja mig núna eftir smá stund, sem er ansi vel þegið. Ég fæ 1-2 tíma í svefn, ég er orðin frekar helluð á því.“

Hún segir að undirbúningurinn hafi verið strangur. Stöð 2 Sport og Vísir mun sýna frá og fjalla um Wow Cyclothon hjólreiðakeppni þar sem hjólað er í kringum Ísland og áheitum safnað til styrktar uppbyggingar Batamiðstöðvar á Kleppi.

„Við hvetjum alla til þess að styrkja okkur, það er rosalega auðvelt bara með því að senda sms-ið 1118 í númerið 907 1501. Þá ertu að styrkja málefnið um þúsund krónur. Síðan er hægt að fara á síðu keppninnar og leggja beint inn á okkar lið.“

Hún bætir síðan við að lokum: „Mig langar að hvetja fólk til þess að læka síðuna okkar, WOW Freyjur – Cyclothon, við erum komnar með þúsund læk. Ef við náum tvö þúsund lækum þá skulum við hjóla naktar.“

Hér má sjá Facebook-síðuna og hvetur Lífið lesendur til þess að like-a síðuna.

Í keppninni verður hjólað með boðsveitarformi hringinn í kringum Ísland, um Hvalfjörð og yfir Öxi á innan við 72 tímum.