BMW kynnir nýja sjöu 10. júní

Flaggskip BMW hefur lengi verið 7-línan og fer þar fremur stór lúxusbíll með þekkta aksturseiginleika BMW bíla. BMW mun kynna nýja kynslóð af þessum kostagrip á miðvikudaginn í næstu viku, 10. júní.

Stærsti hluti yfirbyggingar nýrrar sjöu er úr koltrefjum, enda hefur hann lést um 135 kíló á milli kynslóða þrátt fyrir að vera troðinn nýjustu tækni. Bílnum má leggja í stæði með fjarstýringu í lykli hans.

Stýra má afþreyingarkerfi bílsins með því að veifa höndunum í rétta átt fyrir hverja aðgerð, allt til þess gert að tryggja að ökumaður þurfi ekki að taka augun af veginum. Hægt verður að fá bílinn með stóru glerþaki, svo birta mun leika um glæsta innréttingu hans. Aðalljósin verða af laser-gerð, en ekki eru margir bílar sem skarta slíkum ljósum í dag.

Sjá má stutt kynningarmyndband hér að ofan sem BMW hefur sent frá sér af bílnum, en sannast sagna sést ekki mikið af bílnum þó glitti í fallega skapaðar línur hans og hluta innréttingarinnar.