Fjögur handrit og frímerki

„Strangt til tekið komu út átta frímerki á árinu skreytt handritum, sex á Íslandi og tvö í Danmörku. Ég ætla að segja frá frímerkjunum og handritunum sem urðu fyrir valinu á þau,“ segir Guðvarður Már Gunnlaugsson, dósent við Árnastofnun, um fyrirlestur sem hann heldur í Þjóðminjasafninu klukkan 12.10 í dag, á fæðingardegi Árna Magnússonar handritasafnara.

Sum frímerkjanna sem Guðvarður talar um eru gefin út í tilefni þess að Árni hefði orðið 350 ára í fyrra. Handritin eru úr danskri lögbók og Njálu. „Það vill svo vel til að eitt handrita Njálssögu er myndskreytt, það lá því beint við að taka mynd af því,“ segir hann.

Íslandspóstur gaf út frímerki í sumar í tilefni af 800 hundruð ára afmæli Sturlu Þórðarsonar sagnaritara. „Sturla skrifaði meðal annars Hákonarsögu Hákonarsonar sem kallaður var „sá gamli“. Sú saga er úr Flateyjarbók og því er tekin mynd úr Flateyjarbók úr upphafi Hákonarsögu,“ segir Guðvarður. „Svo eru frímerki úr Íslensku teiknibókinni sem kom út í fyrra og ég segi aðeins frá þeim.“

Í viðbót kveðst Guðvarður aðeins ætla að tala um miðaldahandrit almennt og hversu snögga hann telur menn hafa verið að skrifa Flateyjarbók.