Real Madrid leiðir slaginn um norska ungstirnið

Norski táningurinn Martin Odegaard er einn eftirsóttasti knattspyrnumaður heims þrátt fyrir að vera aðeins fimmtán ára gamall. Flest stærstu lið Evrópu eru á höttunum eftir honum.

Odegaard verður sextán ára gamall í desember og er Real Madrid tilbúið með fimm ára samning handa honum um leið og hann á afmæli.

Norðmaðurinn ungi hefur ekki samið við Real Madrid en hann getur nánast valið hvaða lið hann semur við á sextán ára afmælisdaginn velji hann að fara frá Noregi.

Odegaard heldur með Liverpool í ensku knattspyrnunni og hefur verið boðið til æfinga hjá félaginu fyrir jól.

Manchester United og fleiri lið hafa verið orðuð við Odegaard sem er í öfundsverðri stöðu þó valið geti verið erfitt.