Atlético Madrid aftur á toppinn

Koke tryggði Atlético Madrid 2-1 útisigur á Athletic Club í Bilbao í spænsku úrvalsdeildinni í fótbolta í kvöld og þar með endurheimti Atlético efsta sætið í spænsku deildinni en Barcelona komst þangað fyrr í dag eftir 1-0 sigur á Espanyol.

Kvöldið byrjaði ekki vel fyrir Atlético Madrid því Iker Muniain kom Athletic í 1-0 strax á 6. mínútu leiksins. Lærisveinar Diego Simeone lögðu ekki árar í bát á erfiðum útivelli.

Markakóngur Diego Costa jafnaði metin eftir sendingu frá Koke á 22. mínútu og Koke skoraði síðan sigurmarkið eftir tíu mínútna leik í seinni hálfleik. Bilbao endaði með tíu menn eftir að Frakkinn Aymeric Laporte fékk sitt annað gula spjald á 86. mínútu.

Atlético Madrid ætlar ekkert að gefa eftir í baráttunni um spænska meistaratitilinn en þetta var fimmti deildarsigur liðsins í röð.