Leit að veruleika

Ég er með smá verkefni handa þér. Ef þú ert ekki að lesa þennan pistil á netinu þá vil ég að þú setjist núna fyrir framan nettengda tölvu. Þú þarft að finna þér leitarvél, ég mæli með Google.is, og þar vil ég að þú leitir að nokkrum orðum. Í dag ætlum við að einbeita okkur að myndum því myndir segja jú meira en þúsund orð.

Fyrst legg ég til að þú leitir að myndum af skólastrákum. Af því að tungumál netsins er enska þá þarft þú að skrifa „schoolboy". Nú færð þú upp fullt af myndum. Þetta eru myndir af litlum sætum strákum með skólatösku á bakinu. Þeir eru sumir með blýant í hönd og jafnvel virðulegir drengir með bindi.

Næst þarft þú að gúggla skólastelpur, „schoolgirl". Nú færðu upp myndir af litlum sætum stelpum. Sumar þeirra eru reyndar ekki svo litlar en þær þykjast vera það. Þær eru í fráhnepptum skyrtum sem sýna brjóstaskoruna vel og þær eru í allt of stuttum pilsum sem ná ekki að hylja rassinn þegar þær halla sér munúðarfullar fram.

Nýtt verkefni. Nú leitum við að myndum eftir heimsálfum. Fyrst leitar þú að öllu sem er evrópskt, „european". Þarna kemur Evrópusambandið sterkt inn, fánar nokkurra landa svo og kortamynd af Evrópu. Næst skulum við gúggla „american". Þá sjáum við bandaríska fánann, bandaríska fánann og bandaríska fánann. Ein heimsálfa í viðbót: Asía. Nú skrifum við „asian" inn í leitarvélina. Nú tökum við upp skrifblokkina og punktum hjá okkur hversu margar myndirnar eru af konum sem eru ekki í neinu að ofan nema brjóstahaldara.

Þessu allsendis ótengt þá heyrði ég brandara um daginn. Hann var um Google. Brandarinn var: Hvort er Google stelpa eða strákur? Svar: Stelpa, því hún leyfir þér aldrei að klára sjálfur setningar og leggur þér sífellt orð í munn.