Blanda komin yfir 1.100 laxa

Þó að laxveiðin í Blöndu hafi ekki verið eins mikil í sumar og á tveimur síðustu árum hefur veiðin verið þokkaleg. Samkvæmt upplýsingum frá Lax-á hafa veiðst um 1.100 laxar.

Hlutfall stórlaxa er sagt vera hátt eins og vanalega. Þá segir á agn.is að staðan í Blöndulóni sé „betri en menn þorðu að vona“. Norðurá í Borgarfirði var hins vegar komin í 1.170 veidda laxa fyrir viku.

Miðað við heimasíðu Landsvirkjunar er vatnshæðin í lóninu nú svipuð og verið hefur á þessum árstíma að meðaltali síðustu fimm ár. Haldist það má búast við að Blanda fari ekki á yfirfall fyrr en eitthvað er liðið af ágúst.

- gar