Farið að bera á sjóbirting

Sjóbirtingsveiðimenn bíða nú eftir sunnanáttinni, líkt og aðrir stangaveiðimenn. Ljóst er að sjóbirtingur er mættur í vatnamót Tungufljóts í Skaftafellssýslu.

Veiðimenn sem áttu hollið 10-12. september í Tungufljóti fengu tíu fiska, einn lax og níu sjóbirtinga. Flestir birtinganna fengust í vatnamótunum við Ása-Eldvatn og því ljóst að birtingurinn er mættur til leiks.  Eitthvað urðu menn varir upp í á, misstu meðal annars fiska í Búrhyl og fiskur var einnig í Bjarnarfossi.

Nú bíða menn eftir suð-austanáttinni sem búið er að lofa í lok vikunnar. Gæti hún lyft veiðánum sem margar hverjar eru orðnar ansi vatnslitlar eftir brakandi þurrka undanfarið.

Birt með góðfúslegu leyfi SVFR