Átta töp í röð hjá Kristianstad

Íslendingaliðið Kristianstad í sænsku úrvalsdeildinni í knattspyrnu tapaði áttunda leiknum sínum í röð í dag þegar það lá 2-1 fyrir Sunnana.

Lærisveinar Elísabetar Gunnarsdóttur hafa þar með tapað öllum leikjum sínum í deildinni og eru í neðsta sæti deildarinnar.

Hólmfríður Magnúsdóttir, Erla Steina Arnardóttir og Guðný Björk Óðinsdóttir voru allar á sínum stað í liði Kristianstad í dag.

Örebro og Djurgarden skildu jöfn 2-2. Ólína Viðarsdóttir skoraði fyrsta mark Örebro í leiknum og Edda Garðarsdóttir var líka í byrjunarliðinu. Guðrún Sóley Gunnarsdóttir skoraði jöfnunarmark Djurgarden.