Þrjár bækur á sófaborðið

Ljósmyndarinn Mario Testino hefur tekið einstök portrett af frægum einstaklingum, og meðal annars fangað Kate Moss, Gisele Bundchen, Gwyneth Paltrow, Díönu prinsessu og Madonnu á filmu. Myndir hans eru eins konar skrásetning á poppmenningu samtímans og nú getur hinn ófrægari almenningur borið þessar gyðjur augum í bókinni „Let Me In!“ (www.taschen.com) Bókin sýnir mikið af óuppstilltum og skemmtilegum myndum af frægu fólki sem gerir það einhvern veginn … mannlegra. Önnur bók sem er helguð fyrirsætum og frægu fólki er Face of Fashion (www.aperture.org), en í henni er að finna portrettmyndir eftir fræga ljósmyndara eins og Steven Klein, Paolo Roversi, Mario Sorrenti og Corinne Day. Meðal verka í bókinni eru frægu nektarmyndirnar sem Corinne Day tók af Kate Moss og myndir Steven Klein af Madonnu að hnykla vöðvana … og svo síðast en ekki síst fyrir þá sem vilja innsýn inn í hinn brjálaða heim tískunnar: Happy Birthday Glamour Puss! (www.oneeyedjackspublishing.com) sem er 256 síðna svört-hvít ljósmyndabók tekin í afmælisveislu Jean Paul Gaultier í október af Michel Haddi. Stórskemmtilegar myndir af frægu fólki að gretta sig framan í myndavélina eða af tískuliðinu svolgrandi í sig kampavín. - amb