Golfið á Sýn í kvöld

Nú stendur keppni á World Golf Championship í San Francisco sem hæst og áskrifendur Sýnar geta barið marga af bestu kylfingum heims augum þegar útsending frá mótinu hefst klukkan 18:20 í dag. John Daly tók forystu á mótinu í gær þegar hann lék þriðja hring sinn í röð á 67 höggum og var á níu höggum undir pari. Skotinn Colin Montgomery kom næstur á átta undir pari, en hann var í forystunni eftir tvo fyrstu dagana. Tiger Woods kemur þar skammt á eftir og er í þriðja sætinu. Daly var sáttur við að vera með forystuna í gær og sló á létta strengi þegar hann var spurður hvernig væri að vera í forystunni. "Það er vissulega gaman, en ég skil ekki hvernig í ósköpunum Tiger fer að því að gera þetta á hverjum einasta degi," sagði háðfuglinn Daly.