Kosningarútur liðin tíð?

Hjálp! Það eru blaðamenn á eftir mér! Þannig gæti harmakvein breskra stjórnmálamanna hljómað en þeir sjá sér þann kost vænstan að forðast bresku pressuna í miðri kosningabaráttunni. Breskir stjórnmálaleiðtogar gera allt sem þeir geta til að forðast pressuna á ferðalögum sínum fyrir þingkosningarnar í næsta mánuði. Breskir fjölmiðlar eru gríðarlega áhrifamiklir og eru jafnvel taldir hafa ráðið úrslitum í þingkosningum. Spunakerlingar breskra stjórnmálamanna hafa nú komist að þeirri niðurstöðu að líklega sé það ekki besta leiðin fyrir þá að koma skilaboðum sínum á framfæri að tala við blaðamenn, og því forðast stjórnmálamenn þá eins og heitan eldinn. Þeir ferðast til að mynda á milli kosningasamkundna á þyrlum en ekki í kosningarútum eins og hingað til. Á samkundunum taka þeir við spurningum héraðsblaðamanna en ekki grimmra fulltrúa stórra fjölmiðla. Í ofanálag segir í breskum fjölmiðlum að aðeins heitum stuðningsmönnum sé hleypt inn á samkundurnar, jafnvel skjóti sömu andlitin upp kollinum á hverri samkundunni á fætur annarri. Það lið er kallað leigustuðningsfólk, eða „rent-a-crowd“. Hvort að þetta skilar sér með einhverjum hætti er hins vegar með öllu óljóst. Það sem er ljóst er að umfjöllun breskra fjölmiðla er fyrir vikið hvorki minni né óvægnari.