Fer vel um þá síðasta spölinn.

"Ég keypti bílinn frá Kaliforníu, fann hann á netinu og lét flytja hann hingað gegnum Norfolk. Notaði tækifærið nú meðan dollarinn er lágur," segir Rúnar Geirmundsson hjá Útfararþjónustunni og sýnir stoltur nýjan líkbíl sem hann var að kaupa til landsins. Bíllinn er af gerðinni Lincoln Towncar og árgerðin er 2001. Rúnar hefur rekið fyrirtækið Útfararþjónustuna í 14 ár, ásamt sonum sínum en hefur sinnt hinum látnu enn lengur því áður vann hann hjá Kirkjugörðum Reykjavíkur. Lincolninn er þriðji bíll fyrirtækisins. Hinir tveir eru gamlir Cadillacar en líka virðulegir. Annar frá ‘78 sem nú er verið að gera upp sem nýjan og hinn ‘84 módel sem er búinn að þjóna fyrirtækinu frá upphafi. En þar sem tímafrekt getur verið að útvega varahluti í gamla bíla segir Rúnar varasamt að stóla algerlega á þá. "Við viljum bjóða upp á örugga þjónustu og eiga sem nýjastan bíl," segir hann brosandi. Hann fræðir okkur um að líkbílar séu framleiddir eins og fyrir lifandi farþega en síðan breytt í þar til gerðum verksmiðjum. Þá er sett á þá sérstakt hús með afturhlera og brautum í gólfinu til að kistan geti runnið þægilega inn. Nýi bíllinn kom tilbúinn til notkunar. Bílstjórahúsið er leðurklætt en aftur í eru veggirnir fóðraðir með taui, gardínur eru fyrir gluggum og á hliðunum eru bróderuð blóm sem lýsast upp þegar bíllinn er í notkun. "Fólk er ánægt að sjá að það fer vel um þeirra nánustu síðasta pottann. Það er líka markmiðið hjá okkur," segir Rúnar að lokum.